Hindistonlik amaldor selfi qilayotganida tushirib yuborgan smartfonini olish uchun suv omborini quritishni buyurdi

Hindistonning Chxattisgarx shtatida oziq-ovqat mahsulotlari bo‘yicha hukumat bo‘limi xodimi Rajesh Vishvas Samsung telefonini tushirib yuborganidan so‘ng, o‘sha suv omborini quritishni buyurdi, deb yozadi Associated Press.

Vishvas o‘shanda do‘stlari bilan Xerkatta to‘g‘onida piknikka borgan edi. U telefonini suv omboriga selfi olayotganida tushirib yuborgan.

Avvaliga amaldor mahalliy dayverlardan suv tagiga sho‘ng‘ib, smartfonni topishni buyurgan. U qo‘l ostidagilarga telefonida hukumatga tegishli maxfiy ma’lumotlar borligini aytgan. Biroq suvga sho‘ng‘ishga muvaffaqiyatsiz urinishlardan so‘ng, u dizel nasoslari yordamida suvni so‘rib olishga ko‘rsatma bergan.

Natijada uch kun ichida suv omboridan 2 million tonnadan ko‘proq suv chiqarib tashlangan. Mahalliy OAVning ma’lumotlariga ko‘ra, bu suv bilan 1500 akr yer maydonidagi qishloq xo‘jalik ekinlarini sug‘orish mumkin edi.

Keyinroq mahalliy aholining shikoyatiga ko‘ra voqea joyiga irrigatsiya va suv resurslari departamentidan amaldor yetib kelib, suvni ombordan chiqarib tashlash jarayonini to‘xtatdi.
Suv tubiga tushib ketgan smartfon topilgan, biroq qurilmani yoqishning imkoni bo‘lmagan.

Vishvas suv omboridagi suv ekinlarni sug‘orishga yaroqsiz ekanligi hamda suvni nasos yordamida siqib chiqarish haqida yuqori lavozimli boshqa amaldordan og‘zaki ruxsat olganini aytgan. Vishvas suv resurslarini isrof qilganlikda ayblandi hamda lavozimidan chetlashtirildi.