Turkiyada 22 yoshli o‘zbek fuqarosi vatandoshlari tomonidan ayovsiz kaltaklangani, shifoxonaning jonlantirish bo‘limida ekani aytilmoqda (video)
Surxondaryo viloyatining Sho‘rchi tumanida yashovchi 22 yoshli Muhammad Mardonov Turkiyaning Istanbul shahrida 4 nafar vatandoshi tomonidan ayovsiz kaltaklanib, shifoxonaga yotqizilgan. Bu haqda “Daryo”ga kaltaklangan yigitning tog‘asi Farhod Abdumo‘minov xabar berdi.
Maʼlum bo‘lishicha, 2001-yilda tug‘ilgan Muhammad Mardonov 2023-yilning 1-mart kuni ishlash maqsadida Istanbul shahriga jo‘nab ketgan.
“Jiyanimni 2022-yilning noyabr oyida uylantirgandik. Ammo oilaviy muammolar sabab kelin bilan birga yashay olmadi. Shu bois men uyda bo‘lmagan paytimda, yaʼni 2023-yilning 1-mart kuni jiyanim ishlash maqsadida Turkiyaning Istanbul shahriga jo‘nab ketgan. Jiyanimning onasi, opam ham ancha yillar oldin Turkiyaga ketib, o‘sha yerda ishlab, yashab yurardi. Jiyanim dastlab onasining oldiga, Izmirga borgan. Keyin ishlash maqsadida Istanbulga ketgan”, — deydi kaltaklangan bolaning tog‘asi Farhod Abdumo‘minov.
Kaltaklangan bolaning yaqiniga ko‘ra, Muhammad Mardonov tanishining topshirig‘iga ko‘ra do‘pposlangan.
“Jiyanimni avvaldan unga xusumati bo‘lgan Eldor ismli sinfdoshi Turkiyadan odam yollab, iftorlik qilib berish bahonasida chaqirib, ko‘pchilikka kaltaklatgan. Hatto uning ko‘ziga gaz ham sepishgan. Jiyanim vahshiylarcha kaltaklangani yetmagandek, og‘ir ahvolda ko‘chaga tashlab ketilgan. Ayni paytda u Istanbuldagi shifoxonada. Opam ham Izmirdan Istanbulga yetib kelyapti”, — deydi kaltaklangan bolaning tog‘asi.
Murojaatchi turkiyalik shifokorlar bemorni og‘ir ahvolda O‘zbekistonga qaytarib yuboramiz deyishayotganidan qo‘rqayotganini aytmoqda.
“Ayni paytda jiyanim Istanbuldagi shifoxonalardan birining jonlantirish bo‘limida yotibdi. Shifokorlar bemorni O‘zbekistonga yuboramiz deyishmoqda. Biz jiyanimga yordam ko‘rsatilmasligidan qo‘rqyapmiz”, — deydi murojaatchi.
