Turkiya lirasi yana rekord darajada tushib ketdi

Turkiya milliy valyutasi bugun, 26-sentyabrda 1 dollar uchun 18,44 turk lirasiga tushib, rekord darajada pastladi. Bu haqda “TASS” xabar bermoqda.

22-sentyabr kuni Turkiya Markaziy banki haftalik repo auksionlari (qimmatli qog‘ozlar bilan ta’minlangan qisqa muddatli kredit) stavkasini 12 foizga tushirgan. Bu mamlakat milliy valyutasining zaiflashishiga ham xizmat qilmoqda.

Avgust oyi boshida Turkiya Statistika instituti 2022-yil iyul oyida mamlakatda yillik inflyatsiya darajasi 79,6 foizni tashkil qilgani haqida xabar bergan edi.

Bu ko‘rsatkich 2002-yildan beri eng yuqori ko‘rsatkichdir. Turkiya prezidentining so‘zlariga ko‘ra, hozirda mamlakatning asosiy muammosi inflyatsiya hisoblanadi.

Biroq avgust oyida bo‘lib o‘tgan vazirlar mahkamasi yig‘ilishidan so‘ng u fuqarolarni mamlakat hukumati bu muammoni hal qila olishiga ishontirgan.

O‘tgan yilning dekabr oyidan beri Turkiya hukumati turk lirasini mustahkamlashga qaratilgan “yangi iqtisodiy siyosat” deb ataladigan siyosatni olib bormoqda.

Biroq yil boshidan buyon turk milliy valyutasi 25 foizdan ortiq qadrsizlandi va iqtisodchilarning fikricha, bu tendensiya davom etadi.