Samarqanddagi oliy ta’lim muassasalarida o‘qish sentabr oyining oxirida boshlanadi. Bu haqda Urgut tumani hokimligi xabar qildi.
Qayd etilishicha, 15—16-sentabr kunlari Samarqand Shanxay hamkorlik tashkilotining navbatdagi sammitida mezbonlik qiladi.
Shu munosabat bilan Samarqanddagi oliy ta’lim muassasalari boshqa viloyat OTMlaridan istisno tarzida o‘qishni sentabr oyining oxirlaridan boshlaydi. Taxminiy sana — 22 yoki 26-sentabr.
Joriy yil Samarqanddagi oliygohlarga o‘qishga o‘tadigan abituriyentlar ham sentabr oyining oxirida o‘qishini boshlaydi.
Ma’lumot uchun, Shanxay hamkorlik tashkilotining Samarqand sammiti Eron 2021-yil sentabrida tashkilotga to‘laqonli ishtirokchi sifatida qo‘shilganidan beri birinchisi bo‘ladi. SHHTga a’zo davlatlar: O‘zbekiston, Xitoy, Rossiya, Qozog‘iston, Qirg‘iziston, Tojikiston, Pokiston, Hindiston va Eron. Afg‘oniston, Mo‘g‘uliston va Belarus tashkilotda kuzatuvchi, Turkiya esa muloqot bo‘yicha hamkor sifatida ishtirok etadi.
Sammitda tashkilotga a’zo ko‘plab davlatlar bilan umumiy chegaraga ega Afg‘onistondagi vaziyat har tomonlama muhokama qilinadi va muhim qarorlar qabul qilinishi kutilmoqda. Mavzuga doir:
