To‘qayev Qozog‘iston nomini o‘zgartirish taklifiga munosabat bildirdi

Prezident Qosim-Jo‘mart To‘qayev Qozog‘iston nomini o‘zgartirish taklifiga munosabat bildirdi, deya yozadi Tengrinews nashri.

“Ba’zi fuqarolar referendum paytida davlat nomini o‘zgartirishni taklif qildi. Ularning fikricha, mamlakat nomi yakunidagi “iston” qo‘shimchasi Qozog‘iston va butun Osiyo uchun begona. Men buni asosli deb ayta olmayman. Chunki dunyoda Pokiston, Hindiston, Afg‘oniston va Markaziy Osiyo mamlakatlari kabi davlatlar bor”, — dedi To‘qayev Milliy qurultoyning birinchi yig‘ilishida.

Prezident mustaqil Qozog‘iston nomidan ko‘plab xalqaro shartnomalar imzolanganini, davlat chegaralari belgilanganini ta’kidladi.

“Shuning uchun bunday sharoitda mamlakat nomini o‘zgartirish mas’uliyatsiz qaror bo‘ladi. Bu davlat xavfsizligi va fuqarolarimizning tinch hayotiga bevosita ta‘sir etadi” —  deya qo‘shimcha qiladi To‘qayev.

Eslatib o‘tamiz, 2014-yilda mamlakatda Qozog‘iston nomini “Qozoq eli” deb o‘zgartirish masalasi muhokama qilingan edi.

Mavzuga doir:

• Deputat Qozog‘istonning nomini o‘zgartirishni taklif qildi
• Qozog‘iston Senat raisi: Mamlakatni qayta nomlashda hech qanday ma’no yo‘q