“Daryo”ning ijtimoiy tarmoqlardagi sahifalarida namoyish etib borilayotgan “Muborak oy shukuhi” dasturining navbatdagi sonida Toshkent shahridagi “Minor” masjidi imom noibi Navro‘zjon Temirov bilan “Bid’at va xurofotlar illati” mavzusida suhbat uyushtirildi.
“Ziyoratgohlarda ulug‘ zotlarning qabrlariga sig‘inib, farzand so‘rayotgan insonlar nahotki bir tafakkur qilmaydiki, agar qabrdagi zot unga bir jon bera olganda, uning o‘zi shu jondan mahrum bo‘lib yotmasdi-ku! Agar boshqalarga farzand berishga qodir bo‘lganda, uning o‘zi abadiy yashab qolmasmidi?! Bu judayam bid’atlarning yomoni.
Yurtimizning so‘lim diyorlaridan biriga borganimizda bir voqeaga guvoh bo‘ldim. O‘sha yerda ming yillik archa bor ekan. Mana shu archaga odamlar kelib lattalarni bog‘lashyapti. Bir guruh maktab o‘quvchilari shu ishni qilishayotganini ko‘rdim. O‘sha yerda bir ziyoli inson bor ekan. O‘quvchilardan qilayotgan ishlarining sababini so‘radi.
Ular “Hammamiz bu yil oliy o‘quv yurtlariga kirib olaylik, deb niyat qilib latta bog‘layapmiz. Ijobat bo‘larkan” deyishdi. Shunda haligi odam aytdiki: “Agar shu ming yillik archa seni o‘qishga kiritishga qodir bo‘lganida, o‘zi ham bir institutni tugatgan bo‘lardi!”
Ramazon oyi boshidan beri “Daryo”ning ijtimoiy tarmoqlardagi sahifalarida “Muborak oy shukuhi” deb nomlangan ma’rifiy dastur namoyish etib borilmoqda. Dastur davomida yurtimizning ulamolari bilan turli mavzularda suhbatlar uyushtirilib, muxlislardan kelgan savollarga javob beriladi.
Izoh (0)