Ijtimoiy tarmoqlarda Monopoliyaga qarshi kurashish qo‘mitasi Toshkent bozorlaridagi aravakashlar faoliyatini tartibga solmoqchiligi haqida xabarlar tarqaldi. Qo‘mita mazkur holatga munosabat bildirib, aravakashlar faoliyatini tartibga solish va o‘rganish o‘tkazish rejalashtirilmaganini ma’lum qildi.
Monopoliyaga qarshi kurashish qo‘mitasi Toshkent shahar boshqarmasi boshlig‘i Jo‘rabek Turobov poytaxt kengashida chiqish qilib, bozorlardagi aravakashlar xizmati uchun to‘lovni terminallar orqali to‘lash tartibini joriy etish va ular oladigan haq uchun tariflar belgilashni taklif qilgan.
Qo‘mitaning ma’lum qilishicha, ijtimoiy tarmoqlar orqali tarqalgan videotasvirdagi holat Xalq deputatlari Toshkent shahar kengashining joriy yil 7-mart kunidagi 58-sessiyasida bo‘lib o‘tgan.
Xalq deputatlari Toshkent shahar kengashining deputatlaridan biri 2022-yil 25-fevral kuni Toshkent shahar Xalq deputatlari kengashining 57-sessiyasida Monopoliyaga qarshi kurashish qo‘mitasi Toshkent shahar hududiy boshqarmasiga Toshkent shahri bozorlaridagi arava xizmatlari va ko‘rsatilgan xizmat uchun haq olish yuzasidan masalani o‘rganish topshirilgan. Monopoliyaga qarshi kurashish qo‘mitasi Toshkent shahar hududiy boshqarmasi boshlig‘i Jo‘rabek Turobov mazkur masalani o‘rganib, tasvirlarda ko‘rsatilganidek hisobot bergan.
Bundan tashqari, bozorlarda iste’molchilar huquqlarini himoya qilish va ularga qulayliklar yaratish maqsadida bozorlar ma’muriyatlari tomonidan aravalarni ijaraga berish vazifalarini takomillashtirish yuzasidan u o‘z fikrlarini bildirgan.
“Respublikamiz bozorlarida savdo faoliyatini tashkil etish va xizmatlar ko‘rsatish Vazirlar Mahkamasining 2012-yil 28-avgustdagi 253-son qarori bilan tasdiqlangan “O‘zbekiston Respublikasi bozorlarida savdo faoliyatini tashkil etish” qoidalariga muvofiq amalga oshiriladi. Mazkur qoidaga muvofiq bozorni boshqarish bozor ma’muriyati tomonidan amalga oshiriladi, unga ushbu qoidalar va boshqa qonun hujjatlari talablariga rioya qilish uchun javobgarlik yuklangan. Qo‘mita tomonidan aravakashlar faoliyatini tartibga solish va o‘rganish o‘tkazish rejalashtirilmagan”, — deyiladi munosabatda.