Yevroittifoq Rossiyaga qarshi yangi sanksiyalarni e’lon qildi: ayrim banklar SWIFT tizimidan uziladi, Markaziy bank aktivlari esa “falajlantiriladi”

Yevrokomissiya rahbari Ursula fon der Lyayen Ukrainaga bosqini munosabati bilan Rossiyaga qarshi yangi sanksiyalarni e’lon qildi.

Uning so‘zlariga ko‘ra, Yevropa Ittifoqi davlatlari AQSh, Kanada va Buyuk Britaniya bilan birgalikda Rossiyaning ayrim banklarini SWIFT banklararo to‘lov tizimidan uzib qo‘yishga kelishib olgan.

Bu ularning butun dunyo bo‘ylab faoliyatini to‘xtatadi va Rossiya eksporti va importini samarali ravishda bloklaydi, — dedi u.

Shuningdek, G‘arb davlatlari Rossiya Federatsiyasi Markaziy bankining “aktivlarini falaj qilish” niyatida va rossiyalik oligarxlarga o‘z moliyaviy aktivlaridan bozorlarda foydalanishni taqiqlash ustida ish olib boradi.Bundan tashqari, G‘arb badavlat rossiyaliklarga sarmoya evaziga chet el fuqaroligini olish imkonini beruvchi “oltin pasportlar” dasturidan voz kechmoqchi.

Putin Ukrainani yo‘q qilish yo‘liga o‘tdi. Ammo uning qilayotgan ishi aslida o‘z mamlakatining kelajagini yo‘q qilishdir, — deya so‘zini yakunladi Ursula fon der Lyayen.

24-fevralda Rossiya Ukrainaga bostirib kirgach, Buyuk Britaniya mamlakatga qarshi yangi sanksiyalar qo‘llagan, xususan “Aeroflot” kompaniyasining qirollik hududiga parvozlarini taqiqlagan. AQSh prezidenti Jo Bayden ham Rossiyaga nisbatan yangi sanksiyalar joriy qilgan. Shuningdek, Bayden Rossiyaning Ukrainaga hujumi uchun javobgarlik Vladimir Putinning zimmasida ekani, Rossiya ushbu harbiy operatsiya uchun jiddiy zarbalar qabul qilib olishi haqida gapirgan.

Keyinchalik 25-fevralda AQSh Putin, Lavrov va Shoyguga qarshi sanksiyalar e’lon qildi, shuningdek 26-fevralda Oq uyning Zelenskiyga Kiyevni tark etishida yordam berishga tayyorligi xabar qilindi. AQSh prezidenti Jo Bayden Ukrainaga harbiy ehtiyojlar uchun zudlik bilan moliyaviy yordam ko‘rsatishni buyurgan, Fransiya prezidenti Emmanuel Makron esa Ukrainadagi urushning uzoq davom etishini taxmin qilgan.