Samarqand viloyati Urgut tumanida joylashgan Qizilturk koni kimoshdi savdosiga qo‘yildi. Lot ma’lumotlari E-auksion portalida e’lon qilingan.
Oltin koni Urgut shahridan 35 km uzoqda bo‘lib Zarafshon—Hissor tog‘ tizmalarida joylashgan. Qizlturkning maydoni — 1 643 gektar.
Buyurtmachi sifatida Davlat geologiya va mineral resurslar qo‘mitasi ko‘rsatilgan.
Obyektdan foydalanish uchun bir nechta talablar qo‘yilgan. Lot izohida yozilishicha, oltin koniga bir yil davomida 20 mln dollardan kam bo‘lmagan investitsiyalar jalb qilinishi kerak. Umumiy jalb etilishi kerak bo‘lgan investitsiyalar — 150 mln dollar.
Bundan tashqari 600 tadan kam bo‘lmagan ish o‘rinlari yaratilishi lozimligi ham qayd etilgan.
Auksionga qo‘yilgan konning boshlang‘ich bahosi — 23,69 mlrd so‘m. Arizalar 24-mart 09:00 ga qadar qabul qilinadi. Savdolar xuddi shu kuni 10:00 da boshlanadi.
Avvalroq qo‘lbola usulda oltin qazib olish uchun yangi yer maydonlari auksionga qo‘yilgani haqida xabar berilgan edi.
Izoh (0)