Qarshida bozorqo‘m 900 ming so‘m pul bilan “qo‘lga tushgani” xabar berilgandi. Viloyat IIB uni firibgarlikda ayblamoqda

Qashqadaryo viloyatining Qarshi shahridagi oziq-ovqat bozorlaridan birining bozorqo‘mi 900 ming so‘m pulni noqonuniy o‘zlashtirayotgan paytida qo‘lga olingani xabar berilgandi. Bozorqo‘mning qilmishini “Daryo”ga ochiqlagan murojaatchilarning aytishicha, vaziyat bosdi-bosdi qilinishi mumkin.

“2021-yil 18-noyabr kuni tadbir o‘tkazilib, bozorqo‘mni 900 ming so‘m pul bilan ushlab ketishgandi. Lekin ertasi kuni yana ishga chiqdi. Bir kun oldin pora bilan ushlangan bozorqo‘mning yana ishga qaytganini ko‘rib hayron qoldik. Katta tadbir natijasi bekor qilinib, voqea imi-jimida yopib yuborilishi mumkinmi?”, — deydi tadbir ishtirokchisi bo‘lgan Husan Mirzayev.

Husan Mirzayevning qo‘shimcha qilishicha, tadbir bo‘lib o‘tgan kun — 2021-yilning 18-dekabr kuni bozordan 2 million 400 ming so‘m pul yig‘ib olingan bo‘lib, shundan 1 million 500 ming so‘mi kassa orqali kirim qilingan. Qolgan pulga esa kimyoviy ishlov berilib, bozorqo‘mga berilgan.

Pora tadbiridan so‘ng ishga qaytgan bozorqo‘m tomonidan ishdan bo‘shatilgan Husan Mirzayev bozorqo‘m bozordan tushgan daromadning ortiqchasini doimiy ravishda unga berilishini talab qilib kelganini aytmoqda.

“Bu holat 2021-yilning 14-noyabridan beri bor. Bozorqo‘m o‘sha paytdan beri yig‘ib olingan pullardan unga berishimni talab qilib keladi. Bu holat kun sayin avj olib borgani bois mas’ul tashkilotlarga murojaat qilishga majbur bo‘ldim. Lekin mas’ullar bunga ahamiyat berishmayapti shekilli, vaziyat hamon o‘sha-o‘sha. Bozorqo‘m esa doimgidek ishini davom ettirmoqda. Men uning ishiga xalal berganim uchun meni ishdan bo‘shatib, tanishlarini ishga oldi”, — deydi Husan Mirzayev.

Murojaatchi mazkur masala yuzasidan viloyat IIBga murojaat qilganini, ular holat o‘rganilayotganini, tez orada javobgarlik masalasi hal etilishini bildirganini aytmoqda.

Mazkur voqea haqida “Daryo” muxbiri bilan suhbatlashgan viloyat IIB axborot xizmati rahbari Javlon Baxtiyev: “Haqiqatan ham o‘tgan shanba kuni tezkor tadbir o‘tkazilgandi. Tadbirda bozorqo‘m bilan bog‘liq holat ro‘y bergani rost. Ammo uni pora bilan qo‘lga tushdi, deyishga shoshmasligimiz kerak. Bu masala yuzasidan tergovga qadar tekshiruv harakatlari olib borilmoqda. Tez orada bu haqda viloyat prokuraturasiga ma’lum qilamiz”, — degandi.

Javlon Baxtiyevning qo‘shimcha qilishicha, bozorqo‘mga nisbatan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari olib borilmoqda.