Samarqand viloyatining Kattaqo‘rg‘on tumanida yarashish taklifiga rad javobini olgan er xotini va uning akasini pichoqlab, ulardan birining qotiliga aylandi. Bu haqda “Daryo”ga MIB matbuot xizmati xabar berdi.
Aniqlanishicha, fuqarolik ishlari bo‘yicha Kattaqo‘rg‘on tumanlararo sudining hal qiluv qaroriga asosan javobgar er A.B. qaramog‘idagi ikki nafar farzandini turmush o‘rtog‘i Z.B. tarbiyasiga olib berish belgilangan va ijro varaqasi byuroga yuborilgan.
Javobgar A.B. 2021-yilning 28-sentabrida davlat ijrochisiga bir necha marotaba qo‘ng‘iroq qilib, bolalarni da’vogar — turmush o‘rtog‘i Z.B.ga ixtiyoriy ravishda topshirishini va u bilan yarashishga qaror qilganini bildirib, xonadoniga davlat ijrochilari hamda turmush o‘rtog‘ini taklif etgan.
Manzilga davlat ijrochilari hamda da’vogar ayol Z.B. ham yetib kelgach, qarzdor A.B. u bilan birga yashashni taklif qilgan, lekin Z.B. bu taklifni rad etgani sababli A.B. janjal ko‘tarib, xonadonidan oshxona pichog‘ini olib chiqib, ayolga tan jarohati yetkazgan.
Bundan tashqari, janjal vaqtida tinchlantirishga harakat qilgan ayolning akasi T.N.ga ham oshxona pichog‘i bilan jarohat yetkazgan.
Natijada Z.B. va T.N. Kattaqo‘rg‘on shahar tibbiyot birlashmasiga olib borilgan. Ularga tez tibbiy yordam ko‘rsatilishiga qaramasdan, ayolning akasi T.N. olgan og‘ir tan jarohatlari oqibatida vafot etgan.
Mazkur holat yuzasidan Kattaqo‘rg‘on shahar prokuraturasi tomonidan Jinoyat kodeksining 97-moddasi (qasddan odam o‘ldirish) bilan jinoyat ishi qo‘zg‘atilib, A.B. protsessual tartibda ushlangan. Hozirda tergov harakatlari o‘tkazilmoqda.
Izoh (0)