O‘zbekiston Prezidenti Shavkat Mirziyoyev 14-sentabr kuni Rossiya prezidenti Vladimir Putin bilan telefon orqali muloqot qildi.

O‘zbekiston bilan Rossiya o‘rtasidagi ko‘p qirrali hamkorlik va strategik sheriklik munosabatlarini yanada mustahkamlashning dolzarb masalalari muhokama qilindi. Afg‘onistonda vujudga kelayotgan vaziyatni hisobga olgan holda mintaqa kun tartibidagi masalalar yuzasidan fikr almashildi.

Shuningdek, prezidentlar bo‘lajak oliy darajadagi uchrashuvlar rejasini ko‘rib chiqdi.

Bundan avval Shavkat Mirziyoyev Dushanbeda ShHTning yubiley sammitida ishtirok etishi haqida xabar berilgandi. Vladimir Putin Tojikiston prezidenti bilan muloqot davomida atrofidagi odamlarda koronavirus aniqlangani sababli o‘zini yakkalash rejimiga kirganini ma’lum qilib, Dushanbega borolmasligini ta’kidlagan. Qayd etilishicha Rossiya prezidenti ShHT sammitida videokonferensaloqa shaklida ishtirok etadi.