Joriy yil 14-avgust kuni Namangan shahar Favqulodda vaziyatlar bo‘limiga Kosonsoy ko‘chasidan oqib o‘tuvchi Shimoliy Farg‘ona kanalida hayvon jasadi oqib ketayotgani haqida ma’lumot kelib tushdi. Bu haqda “Daryo” muxbiri xabar bermoqda.
Voqea joyiga FVB yong‘in-qutqaruv qismi shaxsiy tarkibi yetib borib, nobud bo‘lgan jonivor suvdan olib chiqildi. Uning qo‘y jasadi ekani ma’lum bo‘ldi va obodonlashtirish xodimlariga topshirildi.
“Afsuski, bunday holatlar keyingi paytda ko‘plab uchrayapti. Xodimlarimiz qirg‘oqni mustahkamlash ishlari, cho‘kkanlarni qutqarish davomida kanal va soylarda hayvonlar —mol-qo‘y, eshak jasadlariga duch kelyapti. Boshqarma va bo‘limlarimizga bu haqda murojaat va ma’lumotlar kelib tushyapti. Vaholanki, nobud bo‘lgan hayvonlar maxsus chuqur yoki krematoriyda zararsizlantirilishi kerak. Uy hayvonlarini boqayotganlar parvarishlayotgan hayvonlari nobud bo‘lsa darhol veterinariya mutaxassisiga murojaat etishlari, mutaxassis hayvon o‘limi sabablarini aniqlaganidan so‘ng uni veterinariya-sanitariya qoidalariga rioya qilgan holda zararsizlantirish choralarini ko‘rishlari lozim. Aks holda o‘ta xavfli yuqumli kasalliklar tarqalishiga sababchi bo‘lib qolishlari mumkin”, — deydi viloyat FVB matbuot xizmati rahbari Qahramon Sattarov.
