Samarqand viloyati Payariq tumanida Damas va avtobus ishtirokida yo‘l-transport hodisasi sodir bo‘ldi. Bu haqda viloyat YHXB axborot xizmati xabar berdi.
Hodisa soat 1-iyul kuni soat 12:00 larda Payariq tumani “Eshmonsoq” MFY hududidan o‘tuvchi 4R-48 avtomobil yo‘lining 26-kilometrida sodir bo‘lgan.
Jizzax–Gagarin–Samarqand–Payariq yo‘nalishida aholiga xizmat ko‘rsatuvchi avtobusning yo‘liga qarama-qarshi tomondan harakatlanib kelayotgan Damas rusumli transport vositasining chiqib ketishi natijasida to‘qnashuv sodir bo‘lgan.
To‘qnashuv oqibatida Damas ichida bo‘lgan ikki nafar fuqaro hodisa joyida vafot etgan.
Holat yuzasidan viloyat IIB huzuridagi Tergov boshqarmasi tomonidan Jinoyat kodeksining 266-moddasi 3-qismi (odamlar o‘limiga sabab bo‘lgan transport boshqarish qoidalarini buzish) bilan jinoyat ishi qo‘zg‘atilgan.
Bundan avval Xorazmda piyodani urib yubormaslikka harakat qilgan Damas ag‘darilib ketgani, Buxorodagi mudhish YTHda jarohat olgan yo‘lovchining hayoti saqlab qolingani hamda Qamchiq dovonida “benzovoz” yonib ketishi oqibatida ikki kishi halok bo‘lgani haqida xabar berilgandi.
