Tojikistonda Auto Motors Tadjikistan qo‘shma korxonasi tashkil etiladi, deya xabar qilmoqda UzAuto Motors matbuot xizmati.
Qayd etilishicha, 2021-yilning 9-iyun kuni Tojikistonning Boxtar shahrida O‘zbekiston Prezidentining Tojikistonga tashrifi arafasida birinchi O‘zbekiston–Tojikiston hududlararo investitsiyaviy forum bo‘lib o‘tdi.
Forum davomida UzAuto Motors’ning yengil avtomobillarini ishlab chiqarish Auto Motors Tadjikistan qo‘shma korxonasini tashkil etish bo‘yicha bitim imzolandi. Mazkur loyiha 2021-yilning 21-aprel kuni Tojikiston sanoat va yangi texnologiyalar vaziri – Sherali Kabirning O‘zbekistonga tashrifi chog‘ida erishilgan.
Unga ko‘ra, 2021-yilning 5–7-may kunlari “O‘zavtosanoat” tomonidan ishchi guruh Tojikistonda bo‘lib, hamkor “AlyuminSoxtmon” kompaniyasining ishlab chiqarish quvvatini o‘rganib, qo‘shma korxona yaratish bo‘yicha muzokaralar olib borib qaytdi.
Umumiy qiymati 2 million AQSh dollarini tashkil qilgan loyihaning dastlabki bosqichida ishlab chiqarish hajmi 10 000 dona transport vositasini tashkil qilsa, kelgusida uni 35 000 donaga oshirish rejalashtirilgan.
Eslatib o‘tamiz, 2020-yilning 28-mart kuni Qozog‘istonning Ko‘stanay shahrida “Sariarka AvtoProm” MChJ ishlab chiqarish quvvatlarida Chevrolet brendi ostida UzAuto Motors avtomobillarining yig‘ish yo‘lga qo‘yilgandi.
Bundan avval UzAuto Motors “shapka tizimi” yana qaytgani to‘g‘risidagi xabarlarga munosabat bildirgani, O‘zbekistonda sotuvdan olingan Equinox modelini Qozog‘istonda sotish boshlangani hamda Shavkat Mirziyoyev “O‘zavtosanoat”da ishlab chiqarish hajmi 40 foizga kamayib ketganini tanqid qilgani haqida xabar berilgandi.