O‘zbekiston tashqi qarzi 2020-yilda nimalarga sarflandi?

Moliya vaziri Timur Ishmetov 28-may kuni Oliy Majlis Senatining yalpi majlisida 2020-yilda O‘zbekiston tashqi qarzi nimalarga sarflangani haqida ma’lumot berdi, deb yozmoqda “Gazeta.uz”.

Uning ma’lum qilishicha, davlat tashqi qarzining hajmi 2021-yil yakuniga ko‘ra 21,1 milliard dollar yoki yalpi ichki mahsulot (YaIM)ga nisbatan 36,5 foizni tashkil etdi. Bundan:

• 15,1 milliard dollar — O‘zbekiston nomidan jalb qilingan tashqi qarz;
• 6 milliard dollar — O‘zbekistonning kafolati ostida jalb qilingan tashqi qarz.

2020-yil yakuni bo‘yicha jami davlat qarzining 17,5 foizi yoki 3,7 milliard dollari davlat budjetini qo‘llab-quvvatlashga, 12,4 foizi yoki 2,6 milliard dollari energetika sohasiga, 11,5 foizi yoki 2,4 milliard dollari transport infratuzilmasiga hamda 11 foizi yoki 2,3 milliard dollari uy-joy kommunal xo‘jaligi sohalariga yo‘naltirilgan mablag‘lar hissasiga to‘g‘ri keladi.

Moliya vazirligi ma’lumotlariga ko‘ra, 2021-yil 1-aprel holati bo‘yicha davlat qarzi 23,2 milliard dollarni yoki YaIMga nisbatan 40,1 foizni tashkil etmoqda. Davlat qarzi 2021-yil boshiga nisbatan 133,7 million dollarga yoki yalpi ichki mahsulotga nisbati 0,3 foizga kamaygan.

Prezidentning 27-maydagi qaroriga ko‘ra, O‘zbekiston Osiyo taraqqiyot banki hamda Osiyo infratuzilmaviy investitsiyalar bankidan jami 200 million dollar qarz oladi.

Mavzuga doir: Shavkat Mirziyoyev O‘zbekistonning tashqi qarzi haqida gapirdi