Samarqand viloyatining Past Darg‘om tumanida 71 yoshli otaxon Damas urib yuborishi oqibatida vafot etdi. Bu haqda viloyat IIB matbuot xizmati xabar berdi.

Foto: Videodan kadr

Voqea 12-may kuni tumanning “Kamolot” MFY hududidan o‘tgan A 377 avtomobil yo‘lining 22-kilometrida yuz bergan. Damas’ni katta tezlikda haydab ketayotgan 32 yoshli haydovchi piyodalar o‘tish joyidan yo‘lni kesib o‘tayotgan 71 yoshli otaxonni urib yuborgan.

Piyoda olgan tan jarohatlaridan shifoxonada vafot etgan.

Avvalroq Samarqand viloyatining Payariq tumanida 9 yoshli bola, Farg‘onada esa 9 yoshli qiz Damas urib yuborishi oqibatida vafot etgandi.  Surxondaryoda esa 3 kishini urib yuborgan Damas haydovchisi voqea joyidan qochib ketgandi. Jabrlanganlarning ikki nafari vafot etgan.