Qirg‘iziston va Tojikiston o‘z harbiy kuchlarini chegara chizig‘idan olib chiqishni yakunladi. Bu haqda Qirg‘iziston Milliy xavfsizlik davlat qo‘mitasi Qirg‘iziston chegara xizmati matbuot xizmati “Interfaks”ga xabar berdi.
“Tomonlar davlat chegarasidan qo‘shimcha kuchlar va texnikalarni o‘z hududlariga olib chiqishni yakunladi. Qirg‘iziston va Tojikiston mudofaa vazirliklari ofitserlaridan iborat qo‘shma komissiya qo‘shimcha kuchlar va texnikalar joylashgan hududlarni tekshirish ishlarini davom ettirmoqda”, — deyiladi xabarda.
Milliy xavfsizlik qo‘mitasi ma’lumotlariga ko‘ra, 3-may kuni soat 09:30 holatiga ko‘ra, davlat chegarasining qirg‘iz-tojik qismidagi vaziyat barqaror. O‘tgan tunda hech qanday voqea yoki otishma qayd etilmagan.
“Chegara bo‘linmalari kuchaytirilgan rejimda navbatchilik qilmoqda, qirg‘iz-tojik davlat chegarasining butun chizig‘i bo‘ylab patrul xizmati amalga oshirilmoqda”, — deya ta’kidladi matbuot xizmati.
Shuningdek, Qirg‘iziston sog‘liqni saqlash vazirining o‘rinbosari Aliza Sultonbekova chegaradagi mojaro natijasida jarohat olgan Qirg‘iziston fuqarolari soni 183 kishiga yetganini ma’lum qildi.
“Tojikiston bilan chegaradagi mojaroda jarohat olgan Qirg‘iziston fuqarolari soni 183 kishiga yetdi, 34 kishi vafot etdi”, — dedi Sultonbekova.
Avvalroq to‘rt kunlik nizo mobaynida Qirg‘iziston tomonida 34 kishi halok bo‘lgani, 178 kishi jabrlangani haqida xabar berilgandi. Qirg‘iziston IIV ma’lumotlariga ko‘ra, nizoda halok bo‘lganlarning barchasi o‘qotar qurol orqali o‘ldirilgan.
Tojikiston hukumati Qirg‘iziston bilan chegaradagi to‘qnashuvlarda halok bo‘lganlar soni haqida rasman e’lon qilganicha yo‘q, ammo mahalliy manbalarga ko‘ra, 2-may kechqurun holatiga taxminan 16 kishi o‘ldirilgan. Yaralanganlar soni 110 kishidan oshadi, ular orasida Isfara shahar meri ham bor.
Tasdiqlanmagan xabarlarga ko‘ra, Tojikiston tomonida halok bo‘lganlar soni 20 nafargacha, yaralanganlar — 160 nafargacha borishi mumkin.
Avvalroq Qirg‘iziston va Tojikiston o‘z qo‘shinlarini davlat chegarasidan olib chiqib ketishni boshlagani, shuningdek, nizo chog‘ida garovga olingan o‘n nafar Qirg‘iziston fuqarosi Tojikistonda asirlikdan ozod etilgani, nizodan keyin 11 ta jinoyat ishi qo‘zg‘atilgani xabar berilgan edi.
Izoh (0)