Namanganda 6 yoshli bola “Jiguli” (“VAZ-2106”) urib yuborishi oqibatida vafot etdi. Bu haqda viloyat IIB matbuot xizmati xabar berdi.
Voqea 25-aprel kuni soat 15:30 larda shaharning “Olvalizor” MFY Marg‘ilon ko‘chasida yuz bergan. “Jiguli”ni boshqarib ketayotgan haydovchi harakat xavfsizligini ta’minlay olmay, to‘satdan yo‘lga yugurib chiqqan 2015-yilda tug‘ilgan bolani urib yuborgan.
Oqibatda 6 yoshli bola olgan tan jarohati oqibatida shifoxonada vafot etgan.
Holat yuzasidan Namangan shahar IIO FMB huzuridagi TB tomonidan Jinoyat kodeksining 266-moddasi 2-qismi (transport vositalari harakati yoki ulardan foydalanish xavfsizligi qoidalarini buzish odamlar o‘limiga sabab bo‘lishi) bilan jinoyat ishi qo‘zg‘atilgan.
Avvalroq Namanganda “Jiguli” urib ketishi oqibatida 3 yoshli bola, Damas urib yuborishi oqibatida 8 yoshli bola, Nexia urib yuborishi oqibatida 5 yoshli qizcha shifoxonada vafot etgani haqida xabar berilgan edi. Shuningdek, Namanganda velosipedchini urib, voqea joyidan ketib qolgan Kia haydovchisi ushlangani ma’lum qilingandi.
