Jizzax viloyati Favqulodda vaziyatlar boshqarmasi xodimlari quduqqa tushib ketgan sigirni chiqarib oldi, deb xabar beradi FVV matbuot xizmati.
Ma’lum qilinishicha, 25-aprel kuni soat 17:40 larda Jizzax viloyati Favqulodda vaziyatlar boshqarmasining tezkor boshqaruv markaziga 1050 qisqa raqami orqali Forish tumani “Osmonsoy” qishlog‘ida istiqomat qiluvchi fuqaro sigiri hovlisida qazilgan quduqqa tushib ketganini bildirgan. Fuqaro chuqurligi 9—10 metr bo‘lgan quduqdan sigirni chiqarib olishda yordam so‘ragan.
Mazkur murojaat yuzasidan boshqarma yong‘in-qutqaruv otryadi aytilgan manzilga yetib borgan. Qutqaruvchilar tomonidan olib borilgan tezkor harakatlar natijasida maxsus qutqaruv asbob-anjomlari yordamida sigir biror shikastsiz quduqdan chiqarib olingan.
Eslatib o‘tamiz, bunga qadar FVV xodimlari tomonidan Namanganda kanalizatsiya qudug‘iga tushib ketgan sigir qutqarilgan, Surxondaryoda 6 metrlik chuqurga tushib ketgan sigir chiqarib olingan edi.
Izoh (0)