Xiaomi kompaniyasi 3-aprel kuni Xitoyda navbatdagi Mi Home do‘konini ochdi, deb xabar beradi IXBT. Ushbu do‘kon kompaniyaning hisob bo‘yicha 5000-do‘koniga aylangan.

Foto: IXBT

So‘nggi oylarda Xiaomi chakana savdo do‘konlarini ko‘paytirmoqda. 2019-yilning yakunidagi holatlarga ko‘ra, Xitoyda Xiaomi’ning 630 ta do‘koni bo‘lgan. 2020-yil 6-dekabr kuni esa kompaniya do‘konlari 1000 taga, yanvar boshida esa 2000 taga yetgan.

“Xiaomi’ning mobil telefonlarini oflayn-biznesi mobil qurilmalarni ‘fastfud’ kabi sotishdan iborat — do‘konlardagi tovar aylanmasi samaradorligini oshirishimiz va foyda ko‘rish uchun yetkazib berishlarni oshirishimiz kerak”, — dedi Xiaomi China vitse-prezidenti Gao Sziguan.

Foto: IXBT

5000-do‘kon Xitoy shimoli-sharqidagi Shenyan shahrida ochilgan. U yerda ishlab chiqaruvchining eng so‘nggi flagmanlari, xususan, Xiaomi Mi Mix Fold, Xiaomi Mi 11 Pro va Xiaomi Mi 11 Ultra modellari taqdim etiladi.