Xiaomi kompaniyasi yangi qurilmalari taqdimotining ikkinchi qismida o‘zining birinchi buklanuvchan smartfoni Mi MIX Fold’ni, Mi Pro lineykasidagi ikkita noutbuk, maishiy texnika, yangilangan logotipni namoyish etdi va elektromobillar ishlab chiqarishga oid rejasi bilan bo‘lishdi, deb xabar beradi “Afisha.uz”.

Foto: “Afisha.uz”

Logotip

Foto: “Afisha.uz”

Firmaning yangi uslubi Alive (“Jonli”) nomini olgan. Uning ustida yaponiyalik grafik dizayner Kenya Xara ish olib borgan. Shrift va rang o‘zgarmagan, biroq burchaklar ancha yumaloqlashgan.

Elektromobillar

Taqdimotda Xiaomi vakillari o‘z elektromobillarini ishlab chiqarishni tasdiqlagan. Buning uchun kompaniya sho‘ba korxona yaratadi. Mazkur ishlab chiqarishga yaqin o‘n yil ichida 10 milliard dollar sarmoya kiritish rejalashtirilmoqda.

Xiaomi Mi Pro 15 va Mi Pro 14

Foto: “Afisha.uz”

Xiaomi’ning ma’lum qilishicha, yangi noutbuklar katta hajmdagi vazifalar bilan ishlovchi professionallar uchun mo‘ljallangan. Ularning korpusi alyuminiydan ishlangan, quvvatlantirish tugmasiga barmoq izi skaneri o‘rnatilgan.

Mi Pro 15’ga 3,5K sifatni qo‘llab-quvvatlovchi 15 dyuymli OLED-displey o‘rnatilgan bo‘lib, tomonlar nisbati 16:10 va Gorillar Glass shishasi bilan himoyalangan. Noutbuk ichiga 11-avlod Intel i5 yoki i7 protsessori, NVIDIA GeForce MX450 yoki AMD Ryzen grafikasi o‘rnatiladi. Akkumulyator 100 vattli tezkor quvvatlanish funksiyasiga ega. Korpusida Thunderbolt 4 standartiga kiruvchi uchta USB-C porti bor.

Foto: “Afisha.uz”

Mi Pro 14 modeli esa 2,5K sifatli hamda 120 gertsli yangilanish chastotasiga ega 14 dyuymli displeyga ega bo‘lgan. Asosiy texnik tavsifi Mi Pro 15’niki bilan bir xil.

Xiaomi Mi Pro 15 va Mi Pro 14’ning Xitoydagi narxlari quyidagicha:

  • Mi Pro 14 Intel Core i5, 16/512 GB — 810 dollar;
  • Mi Pro 14 Intel Core i7, 16/512 GB — 1070 dollar;
  • Mi Pro 14 Intel Core i5, 16/512 GB — 990 dollar;
  • Mi Pro 14 Intel Core i7, 16/512 GB — 1220 dollar.

Xiaomi Mi MIX Fold

Xiaomi’ning buklanuvchan ekranga ega Mi MIX Fold smartfoni taqdimotning asosiy yangiligiga aylandi. U Samsung Galaxy Z Fold2’dagi konstruksiya kabi ichiga buklanadigan ekranga ega bo‘ladi.

Foto: “Afisha.uz”

Qurilmaning tashqi ekrani 6,52 dyuymli AMOLED-ekran bo‘lib, u 840x2520 piksel va 90 gertsli yangilanish chastotasiga ega. Taqdimotda ma’lum qilinishicha, apparatning sharnir mexanizmi 200 ming sikl ochilib/yopilishga bardoshli. Asosiy ekran 120 gertsli yangilanish chastotasiga ega 8,01 dyuymli ekran.

Mi MIX Fold Snapdragon 888 va 12 yoki 16 gigabayt tezkor hamda 256 yoki 512 gigabayt ichi xotirada ishlaydi. Akkumulyator sig‘imi 5020 mA/soat bo‘lib, 67 vattli tezkor quvvatlanish funksiyasini qo‘llab-quvvatlaydi. Yangi qurilmaning interfeysi alohida oyna rejimida ishlay oladi.

Foto: “Afisha.uz”

Mi MIX Fold to‘rtta kameraga ega bo‘lgan: displeyning yuqori qismidagi qirqimda joylashgan frontal, 108 megapikselli asosiy, 13 megapikselli ultra keng burchakli va 8 megapikselli telefoto. Apparat fokus oralig‘ini o‘zgartira oladigan va bir vaqtning o‘zida telefoto va makro suratga olishga xizmat qiladigan suyuq linza bilan yetkazib beriladi.

Foto: “Afisha.uz”

Mi MIX Fold’ning Xitoydagi rasmiy narxi:

  • 12/256 — 1 525 dollar;
  • 12/512 — 1 675 dollar;
  • 16/512 — 1 980 dollar.