Jizzax viloyatining Forish tumanida Cobalt va Volga to‘qnashishi oqibatida uch kishi vafot etdi, yana biri jarohatlandi. Viloyat IIB matbuot xizmatining xabar berishicha, voqea tumanning “Uchma” MFY hududidan o‘tgan Jizzax —Forish —Qizilcha 4R-36 yo‘lining 85-kilometrida yuz bergan.
Navoiy viloyati Nurota tumanida yashovchi J.S. Cobalt’ni haydab ketayotib Forish tumani Qo‘lba qishloq fuqarolar yig‘inida yashovchi Z.D. boshqaruvidagi “GAZ-31” (“Volga”) bilan to‘qnashgan. Oqibatda Cobalt’da yong‘in kelib chiqqan va uning haydovchisi J.S. va yo‘lovchi X.G. kuyish jarohatidan vafot etgan.
“Volga” haydovchisi B.T. tuman tibbiyot birlashmasida ko‘rsatilgan yordamga qaramasdan, hayotdan ko‘z yumgan. Uning yo‘lovchisi I.E. esa bosh miya yopiq jarohati, bosh miya chayqalishi, chap boldir suyagining yopiq sinishi tashxisi bilan shifoxonaning travmatologiya bo‘limiga yotqizilgan.
Holat bo‘yicha jinoyat ishi qo‘zg‘atilgan.
Avvalroq Farg‘onada Lacetti bilan to‘qnashgan Matiz yonib ketishi oqibatida ikki yo‘lovchi ayol vafot etgani, Dehqonobodda Shahrisabzdan kelayotgan yuk mashinasida yong‘in chiqqani, Surxondaryodan Toshkentga yo‘lga chiqqan Nexia’ning yonib ketishi oqibatida 3 kishi vafot etgani haqida xabar berilgan edi.
