AQShda koronavirusning ancha xavfli varianti paydo bo‘lgan bo‘lishi mumkin. CNN telekanalining Oq uyga tayanib ma’lum qilishicha, ehtimollarga ko‘ra, uning mutatsiyasi kuz-qish davrida kasallik kuchayishiga olib kelgan.
“AQShda epidemiyaning kuzgi-qishki kuchayishi vaqtida kasallikka chalinish holati bahor hamda yozga nisbatan qariyb ikki barobarga oshdi. Bu kabi tezlashish koronavirusning ‘britancha’ shtammiga qo‘shimcha ravishda AQShning o‘z varianti rivojlangan bo‘lishi mumkin, degan xulosaga kelishga sabab bo‘ladi”, — deyiladi hisobotda.
Virusologlarning taxminicha, koronavirusning yangi shtammi oldingi versiyasidan 50 foizga yuqumliroq.
Eslatib o‘tamiz, Buyuk Britaniyada koronavirusning yangi turi aniqlangani, shu tufayli mamlakatning ayrim hududlarida kasallik tarqalish sur’ati tezlashgani haqida 14-dekabr kuni mahalliy Sog‘liqni saqlash vazirligi rahbari Mettyu Xenkok ma’lum qildi. Buyuk Britaniya bosh vaziri Boris Jonsonning so‘zlariga ko‘ra, ushbu turdagi koronavirus avvalgilaridan 70 foizga yuqumliroq, lekin undan xavfli emas.
Avvalroq koronavirusning “britancha” shtammi 41 ta, “afrikacha” shtammi esa 7 ta mamlakatda aniqlangani, Britaniyada uchinchi lokdaun e’lon qilingani hamda Germaniyada koronavirus tufayli cheklovlar kuchaytirilgani haqida xabarlar berilgandi.
Izoh (0)