Apple kompaniyasi o‘zining saytidagi “Ta’mirlash” va “iPhone’larga xizmat ko‘rsatish” sahifasini yangiladi, deb xabar beradi Itc.
Ma’lum qilinishicha, AppleCare+ kengaytirilgan kafolati bo‘lmasa, iPhone 12 Pro’ning ekranini rasmiy servisda almashtirish 279 dollarga tushadi. Ushbu narx 2017-yilgi iPhoneX davridan buyon o‘zgarishsiz qolmoqda.
Bazaviy iPhone 12 modelining 6,1 dyuymga ega SuperRetinaXDR’li OLED displeyini almashtirish ham xuddi shuncha — 279 dollar. Bu 2019-yilda taqdim etilgan iPhone 11’nikidan 80 dollarga qimmat demak. AppleCare+ kengaytirilgan kafolati bilan ekranni oldingidek 29 dollarga almashtirish mumkin.
Kafolatga kirmaydigan qolgan barcha ta’mirlash ishlari, jumladan, mexanik shikast yetishi (orqa oynani almashtirish) yoki korpus ichiga suyuqlik kirib qolishi oqibatida yetgan zararlar iPhone 12 Pro uchun oldingidek 549 dollar evaziga bartaraf etiladi. iPhone 12 uchun esa iPhone 11’ga qaraganda ushbu jarayon 50 dollarga qimmatlashib, 449 dollarga chiqqan. AppleCare+ yordamida esa Other damage toifasiga kiruvchi turli shikastlarni 99 dollarga ta’mirlasa bo‘ladi.
Avvalroq internetda iPhone 12 Pro’ning ilk haqiqiy videosi paydo bo‘lgani to‘g‘risida xabar berilgandi.