Picodi portali tahlilchilari tadqiqot o‘tkazib, dunyoning qaysi mamlakatida yashovchi aholi Apple’ning yangi mahsuloti — 128 gigabaytli iPhone 12 Pro versiyani xarid qilish imkoniga ega ekanligini aniqladi. Ekspertlar gadjet narxini o‘nlab mamlakatlardagi aholining o‘rtacha ish haqi bilan taqqoslagan.

Foto: IXBT

Devaysning rasmiy narxi 1099 dollarni tashkil etadi.

Shveysariyaliklar iPhone 12 Pro xarid qilishi uchun 4,4 kun, amerikaliklar 6,1 kun, Avstraliya aholisi esa 6,6 kun ishlashi lozim. Polshalik fuqaro yangi iPhone’ni xarid qilishi uchun 28,3 kun ishlashi lozim bo‘lsa, rossiyaliklarda ushbu ko‘rsatkich 47,5 kunga teng.

Foto: Picodi

Hindiston va Meksikaning o‘rtacha statistik aholisi iPhone 12 Pro uchun 54,4 kun ishlashi kerak bo‘ladi.

“iPhone 2020 indeksi” iPhone 12’ning rasmiy narxi asosida hisoblab chiqilgan. Mamlakatlarning o‘rtacha ish haqi esa milliy statistika boshqarmalari saytidan yoki tegishli vazirliklar tomonidan e’lon qilingan ma’lumotlardan olingan.

Davlat statistika qo‘mitasining iyul oyidagi ma’lumotlariga ko‘ra, O‘zbekistonda o‘rtacha oylik nominal hisoblangan ish haqi 2,5 million so‘mni tashkil etgan. Demak, shu kabi oylikda ishlaydigan o‘zbekistonlik yangi iPhone xarid qilishi uchun 136 kun (4,5 oy) ishlashi lozim.

Eslatib o‘tamiz, Apple oktabr oyidagi taqdimotida to‘rtta yangi smartfonini namoyish etdi: iPhone 12 Mini, iPhone 12, iPhone 12 Pro va iPhone 12 Pro Max. Barcha gadjetlar kompaniyaning A14 Bionic protsessoriga ega bo‘lgan. Ishlab chiqaruvchining ta’kidlashicha, bu hozirgi kunda bozorda mavjud eng kuchli mobil protsessor hisoblanadi.