Qashqadaryo viloyatining Dehqonobod tumanida birinchi qor yog‘di. Bu haqda “Daryo”ga tuman xalq ta’limi bo‘limi mudiri o‘rinbosari O‘ktam Toshboyev ma’lum qildi.
O‘ktam Toshboyevning ma’lumot berishicha, qor tuman markazidan 150-170 kilometr uzoqlikdagi Oybek va Duob qishloqlarida yog‘gan.
“Bugun yana besh yuz yillik archalar qalin qor bilan qoplandi. Qish g‘amini yozda ko‘r, deganlaridek, bu yil qishning erta kelishini mutaxassislar qatorida fasllar bo‘yicha yil davomida kuzatishlar olib boruvchi keksalar ham bashorat qilishmoqda. Demak, qish mavsumiga puxta tayyorgarlik ko‘rish har birimizning vazifamizdir. Buni ayniqsa, bugungi pandemiya sharoitida ta’lim muassasalari rahbarlari chuqur his etishlari lozim”, — deydi O‘ktam Toshboyev.
Toshboyevning ma’lumot berishicha, Oybek qishlog‘ida tuman XTBga qarashli 5 ta maktab va 5 ta filial, Duobda esa 6 ta maktab va 1 filial joylashgan.
Mavzuga doir: Bahor faslida Dehqonobodda qor yog‘di (video)
