Yakshanbadan dushanbaga o‘tar kechasi O‘zbekistonga haqiqiy qish kirdi, deb yozmoqda “O‘zgidromet”. Mamlakat hududiga Kavkaz rayonlaridan kirgan sovuq antisiklon butun respublikaga, shimoliy viloyatlar va cho‘l zonasidan tashqari, yog‘ingarchilik olib keldi. Yomg‘ir ko‘rinishida boshlangan yog‘inlar qorga aylandi.
Qayd etilishicha, 13-yanvar, dushanba kuni tonga kelib tekislik hududlarida mavsumdagi birinchi qor qoplami hosil bo‘lib, uning balandligi ayrim joylarda 10—13 santimetrni tashkil qildi.
Bugun kunning birinchi yarmida respublikaning katta qismida kuchsiz qor yog‘ishi davom etdi. Kunning ikkinchi yarmida yog‘ingarchilikning to‘xtashi kutilmoqda, faqat Farg‘ona vodiysi viloyatlarida va tog‘li hududlarda qor kun davomida yog‘adi.
Ertadan boshlab va ish haftasining oxirigacha ob-havoning qanday bo‘lishini antisiklonning sovuq chegarasi belgilaydi. Butun tekislik hududda ob-havo quruq va sovuq bo‘ladi. Faqat O‘zbekistonning tog‘li hududlarida kuchsiz qor yog‘ishi mumkin.
Shu kunlarda havo harorati kechasi 2—7 daraja sovuq, kunduzi 2 daraja sovuq — 3 daraja iliq bo‘ladi. Bu yanvar o‘rtasi uchun harorat me’yorlaridan 3—5 darajaga pastdir.
Izoh (0)