“Jasliq” (19-son ixtisoslashitirilgan jazoni ijro etish koloniyasi) yopiladi. Bu haqda “O‘zbekiston IIV Jamoatchilik va OAV bilan aloqalar boshqarmasi xabar bermoqda.
O‘zbekiston Prezidenti Shavkat Mirziyoyev 2019-yil 2-avgust kuni “Qoraqalpog‘iston Respublikasi Ichki ishlar vazirligining 19-son ixtisoslashtirilgan jazoni ijro etish koloniyasini tugatish to‘g‘risida”gi (“Jasliq” qo‘rg‘onida joylashgan) qarorni imzoladi.
Mazkur tarixiy qaror ozodlikdan mahrum etishga hukm qilingan shaxslarda qonunga itoatkor xulq-atvorni, shaxs va jamiyatga hurmat munosabatini shakllantirishga yo‘natirilgan axloqan tuzatish borasida amalga oshirilayotgan tadbirlar samaradorligini oshirish, shuningdek, 2017 — 2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasida belgilangan vazifalarga muvofiq davlatimizning xalqaro arenalarda ijobiy mavqeini ilgari surish maqsadida qabul qilinganligi qayd etilgan.
Avvalroq, IIV Jazoni ijro etish bosh boshqarmasi Tarbiyaviy va ijtimoiy-psixologik ishlarni tashkil etish boshqarmasi boshlig‘i Jamshid Sultonov “Jasliq” koloniyasi nisbatan yangiligi va mahbuslar uchun kerakli bo‘lgan barcha zazur shart-sharoitlarga egaligi haqida aytib o‘tgan edi.
— Qoraqalpog‘istondagi 19-sonli jazoni ijro etish koloniyasi (“Jasliq” qamoqxonasi) bo‘yicha chet el OAV yoki boshqa xalqaro tashkilotlardan ko‘plab savollar kelib tushadi. Ming afsuski, chet el OAVda ham, mahalliy aholimizda ham “Jasliq” qamoqxonasi mahkumga tazyiq o‘tkaziladigan yoki mahkumlarning huquqlari ta’minlanmaydigan joy deb qarash bor. BMTning din va e’tiqod erkinligi bo‘yicha maxsus ma’ruzachisi Ahmad Shahid 2017-yilda O‘zbekistonga safari davomida “Jasliq” qamoqxonasiga tashrif buyurgan edi. Janob Ahmad Shahid “Jasliq”dagi barcha joyni ko‘zdan kechirib, mahkumlar uchun yetarli sharoit yaratilganiga guvoh bo‘lgan. Chet el OAVda “Jasliq”da mahkumlarga tazyiq o‘tkazish uchun har xil yerto‘lalar yoki turli qiynoqlarga solinadigan alohida xonalar borligi bo‘yicha turli xabarlar tarqalgan. Janob Ahmad Shahid o‘zi shaxsan har bir joyni birma-bir o‘rganib, unday joylar mavjud emasligiga amin bo‘lgan edi, — degan edi Jamshid Sultonov.
Izoh (0)