Britaniyada 10 yil sochini olmagan o‘smir sartaroshni hayratga soldi (foto)

Buyuk Britaniyalik o‘smir 10 yil deganda birinchi marta sartaroshga bordi va o‘z turmagi bilan dahshatga soldi. Bu haqda “RIA Novosti” xabar berdi.

Xabarda aytilishicha, 14 yoshli Oueyn Tomas autizm kasalligiga chalingan bo‘lib, har qanday o‘zgarishlarni qiyinchilik bilan qabul qiladi va sochlarini kestirishdan qo‘rqadi. Bolaning otasi aytishicha, o‘g‘li sochi doim “serferlarnikidek” bo‘lishini xohlagan va sartaroshga borishdan bosh tortgan.

Bolaning onasi soatlab uning sochlarining chigalini yozishga to‘g‘ri kelgan. Yaqinlari esa uni sartaroshga borishga undagan, lekin u ko‘nmagan. Sinfdoshlariga kulgi bo‘lmaslik uchun Oueyn sochlarini turli bosh kiyimlari bilan berkitishga harakat qilgan.

“Men 10 yil ichida uni sartaroshxonaga olib borishga harakat qildim. U kichkinaligida kelgan, lekin shundan beri boshqa borishni xohlamagan”, — degan uning otasi. Uning aytishicha, o‘g‘li hatto sartarosh bo‘lib ishlaydigan tanishlarida ham sochini oldirishni xohlamagan.

Bir kuni maktab rahbariyati bolaning noodatiy ko‘rinishiga e’tibor qaratgan. Uzoq urinishlardan so‘ng, bolani sochlari to‘kilib ketishi bilan qo‘rqitib, uni oldirishga ko‘ndirishgan.

Sartarosh bunday sochga birinchi marta duch kelganini aytgan. U dastlab bolaning chigal sochlarini olib tashlagan, keyin esa turmak shakli ustida ishlagan. Sartarosh, shuningdek, bolaga “serferlar turmagi”ga ega bo‘lish uchun sochni parvarishlovchi maxsus vositalardan foydalanishni maslahat bergan.

Oueynning ota-onasi uning ko‘rinishidan mamnun bo‘lgan. Bola soch oldirayotganida xotirjam o‘tirganiga ham e’tibor bergan. Uni avgust oyiga ham navbatga yozdirib qo‘yishgan, lekin shu bilan birga bolaning ota-onasi uni bunga majbur qilmasligini aytgan.