O‘zbekistonda xizmat ko‘rsatgan san’at arbobi, O‘zbekiston xalq yozuvchisi Turob To‘la tavalludiga 100 yil to‘ldi, deb yozadi O‘zA.
Shoir va dramaturg Turob To‘la 1918-yil Qozog‘istonning Chimkent viloyatidagi Turbat qishlog‘ida, dehqon oilasida tug‘ilib, bolalar uyida tarbiyalandi. 1935—1941-yillarda Toshkent pedagogika institutining kechki bo‘limida tahsil oldi. So‘ngra O‘zbekiston Davlat nashriyotida muharrir, O‘zbekiston radiosida bo‘lim boshqaruvchisi, “O‘zbekfilm” kinostudiyasida adabiy bo‘lim mudiri, Respublika kinochilar uyushmasida kotib, San’at ishlari boshqarmasida boshliq, Yozuvchilar uyushmasi qoshidagi adabiyot targ‘iboti markazida rahbar va boshqa shu kabi mas’ul lavozimlarda faollik ko‘rsatdi.
Turob To‘la she’r yozishni 1930-yillardan boshlagan. 1939-yilda uning birinchi she’rlar to‘plami chiqarilgan. 1941—1945 yillarda u harbiy mavzudagi she’rlari bilan fashizmga bo‘lgan nafratni ifodaladi. Shoirning “Shodligim” (1941), “Tabassum” (1944) to‘plamlaridagi she’rlar qahramon jangchilarga bag‘ishlangan. Turob To‘laning “Baxt tongotari” (1948), “Sening haqingda”, “Qanot qoqing, qo‘shiqlarim”, “Kamalak”, “Nafosat” to‘plamlari ko‘pgina she’r va maqolalarni o‘z ichiga olgan.
U “Bolalar dostoni” (1950) nomli asarida maktab va do‘stlik haqida hikoya qiladi. 1955-yilda Turob To‘la “Qanotlan, qo‘shiqlarim” she’rlar to‘plamini o‘quvchilariga taqdim etdi. Turob To‘la “Rais”, “Marg‘ilonlik qiz”, “Talant”, “Maftuningman”, “Furqat”, “Shashmaqom” “To‘qqizinchi asr monologi”, “Qahr” filmlari ssenariysini yaratishda ishtirok etgan, ayrimlarini o‘zi yozgan.
Turob To‘la dramaturg sifatida “Qari qiz”, “Qizbuloq”, “Momo Yer” (Chingiz Aytmatov asari asosida), “Nodirabegim”, “Qahr” pyesalari respublika teatrlarida qo‘yildi. Shuningdek, u “Zulmatdan ziyo” (Oybekning “Qutlug‘ qon” romani asosida) operasi hamda “Samarqand afsonasi” baleti librettolarini yozgan.
Izoh (0)