O‘FA Tohir Kapadzeni nafaqaga kuzatib qo‘ydi

Bugun, 11-may sanasida O‘zbekiston futbol assotsiatsiyasida Farg‘ona futboli rivojiga uzoq yillar davomida katta hissa qo‘shib kelgan Tohir Kapadzeni nafaqaga kuzatish marosimi bo‘lib o‘tdi. Bu haqda tashkilot rasmiy saytida xabar berildi.

O‘FA rahbariyati Tohir Kapadzega futbol sohasidagi uzoq yillik samarali faoliyati va fidoiy mehnati uchun minnatdorchilik bildirib, tashakkurnoma taqdim etdi.

Shuningdek, o‘zbek milliy an’analariga muvofiq Tohir Kapadzega zarbof to‘n kiydirildi. Bundan tashqari O‘zbekiston futbol assotsiatsiyasi nomidan esdalik sovg‘alari topshirildi.

Tohir Kapadze ko‘rsatilgan e’tibor uchun O‘FA rahbariyatiga minnatdorchilik bildirib, endi davr yoshlarniki ekanini, yosh mutaxassislarga futbol rivoji amalga oshirayotgan chora-tadbirlari davomida maslahatgo‘y bo‘lishga tayyorligini ma’lum qildi, deyiladi xabarda.

Ma’lumot uchun Tohir Kapadze bungacha Farg‘ona viloyati futbol assotsiatsiyasi vitse-prezidenti lavozimida faoliyat yuritib kelayotgan edi.