O‘zbekistonda tibbiy xodimlarning o‘rindoshlik asosida ishlash tartibiga o‘zgartirishlar kiritildi

O‘zbekistonda sog‘liqni saqlash davlat tizimi tashkilotlari xodimlarini o‘rindoshlik asosida hamda bir necha kasb va lavozimda ishlash tartibi takomillashtirildi. Sog‘liqni saqlash vazirligi matbuot xizmati xabariga ko‘ra, bu Vazirlar Mahkamasining 20-noyabrdagi “O‘zbekiston Respublikasi sog‘liqni saqlash davlat tizimi tashkilotlarini kadrlar bilan ta’minlashni yaxshilashga doir qo‘shimcha chora-tadbirlar to‘g‘risida”gi qaroridan so‘ng yuz berdi.

Xabar berishlaricha, endi shifokorlar uchun o‘rindoshlik asosidagi ish vaqtining davom etishi bir oylik norma miqdorigacha belgilanishiga ruxsat berildi. Tibbiyot xodimlarining boshqa toifalari uchun esa oylik normaning yarmidan ortiq bo‘lmasligi belgilandi.

Xodimning asosiy ishi mehnatning noqulay shart-sharoitlari bilan bog‘liq bo‘lgan holda o‘rindoshlik asosida shunday noqulay shart-sharoitlarda ishlashini (jumladan, laboratoriya, rentgen, radiologiya va h.k.) taqiqlash, shuningdek, o‘rindoshlik asosida ishlashning davomiyligi xodimlarga belgilangan ish vaqti normasining yarmidan ortiq bo‘lishi mumkin emas, degan cheklov bekor qilindi. Yanada aniqroq qilib aytadigan bo‘lsak, shifokorlar uchun har ikkala — asosiy va o‘rindoshlik faoliyati noqulay shart-sharoitlar bilan bog‘liq bo‘lgan ishlarda ham ishlashiga ruxsat berildi.

Bundan tashqari, byudjet tashkilotlarida bir necha kasb va lavozimda ishlaganlik, xizmat ko‘rsatish zonasini kengaytirganlik, ish hajmi ko‘payganligi uchun qo‘shimcha haq to‘lash miqdori bir necha kasb va lavozimda ishlagandagi lavozim maoshining 50 foizigacha ko‘tarildi. Ilgari ushbu miqdor 30 foizni tashkil qilar edi.

Mirazim Mirtalipov, Sog‘liqni saqlash vazirligi Iqtisodiyot, moliyalashtirish va istiqbolni aniqlash bosh boshqarmasi boshlig‘i