O‘zbekiston Markaziy banki 22-avgustidan boshlab qiymati 50 000 so‘m bo‘lgan banknot ko‘rinishidagi yangi pul belgilarini muomalaga chiqaradi. Bu haqda bank matbuot xizmati ma’lum qildi.

O‘zbekiston Markaziy bankining qiymati 50 000 so‘m bo‘lgan pul belgilari 144 x 78 millimetr o‘lchamdagi himoyalangan qog‘ozda tayyorlangan. Banknotning o‘ng tarafidagi keng oq rangli sathda O‘zbekiston gerbi va “50000” raqami ko‘rinishida suv belgisi mavjud.

Oq rangli sathning chap tarafidan qog‘oz qatlamida “Darcha” va “3D” effektli yuzaga chiqib, ichkariga botuvchi eni 4 millimetr bo‘lgan himoya ipi o‘tkazilgan.

Banknot old tomonining markazida Mustaqillik maydonidagi “Ezgulik” arkasi tepasidagi parvozga shaylangan laylaklar tasvirlangan.

Foto: O‘zbekiston Markaziy banki

Chap yuqori qismida “O‘ZBEKISTON RESPUBLIKASI MARKAZIY BANKI” yozuvi mavjud. Ushbu matn “O‘ZBEKISTON RESPUBLIKASI” so‘z birikmali takrorlanuvchi mikromatnli chiziq bilan ajratilgan.

Mikromatnli chiziq ostida “O‘ZBEKISTON SO‘MI RESPUBLIKA HUDUDIDA HAMMA TO‘LOVLAR UCHUN O‘Z QIYMATI BO‘YICHA QABUL QILINISHI SHART” matni aks etgan.

Matn ostida to‘q yashil rangdagi O‘zbekiston gerbi tasvirlangan.

Banknot chap tarafining pastki qismida 50 000 raqami va “ELLIK MING SO‘M” yozuvi mavjud bo‘lib, banknotning qiymatini bildiradi.

Yuqoridagi barcha tasvirlar va yozuvlar bo‘rtib turadi, ushlab ko‘rilganda seziladi.

Markazda O‘zbekistonning hoshiyalangan xaritasi joylashgan bo‘lib, uning foni “O‘ZBEKISTON RESPUBLIKASI” so‘z birikmali takrorlanuvchi mikromatn ko‘rinishida ishlangan.

Chap taraf pastki qismidagi va oq rangli sathda joylashgan “50 000” raqamlari tepasida yettita raqamli nomeri bilan ikki lotin harfidan iborat seriyasi joylashgan.

Oq rangli sathning yuqori qismidagi maxsus belgi arka tasviri ko‘rinishida bo‘lib, yorug‘likka qaratilganda arkaning rangi banknot orqa tomonidagi rangli fon bilan to‘ldiriladi.

Arkaning ostida banknot chiqarilgan yil “2017” ko‘rsatilgan.

Oq rangli sathning pastki qismida ko‘rish burchagiga qarab rangini bronza rangidan yashil rangga o‘zgartiruvchi va ushlab ko‘rilganda bilinadigan bo‘rtib turuvchi “50 000” raqami mavjud.

Banknotning orqa tomoni chap qismidagi oq rangli sathda suv belgilari ko‘rinadi. Oq rangdagi sathning yuqori qismida arka tasviri mavjud bo‘lib, yorug‘likda ko‘rilganda banknot old qismidagi tasvir bilan bir-birini to‘ldiradi.

Banknotning markazida “ANJUMANLAR SAROYI” me’moriy binosi tasvirlangan.

Foto: O‘zbekiston Markaziy banki

Tasvirning yuqori chap burchagida bir-birini kesib o‘tuvchi “50 000” va “SO‘M” yozuvlari mavjud bo‘lib, ularning tepasida banknotning qiymati so‘z bilan (“ELLIK MING”) ko‘rsatilgan.

Shuningdek, banknot qiymati “50 000” ko‘rinishida yuqori o‘ng va pastki chap burchaklarda aks etirilgan.

Ostki fon nafis chiziqlar qo‘llanilgan holda ishlangan milliy naqshinkor bezaklar va bo‘rtib turgandek taasurot uyg‘otuvchi banknot qiymati ko‘rinishidagi raqamli tasvirlardan iborat.

Pastki qismida “O‘ZBEKISTON SO‘MINI QALBAKILASHTIRISH QONUNGA MUVOFIQ TA’QIB QILINADI” matni joylashgan.

“Muomalaga chiqarilayotgan qiymati 50 000 so‘m bo‘lgan pul belgilari, ayni paytda muomalada bo‘lgan pul belgilari va tangalar bilan bir qatorda, barcha xo‘jalik yurituvchi subyektlar va aholi tomonidan o‘z qiymati bo‘yicha barcha turdagi to‘lovlar uchun hech qanday cheklovlarsiz qabul qilinishi shart”, — deyiladi Markaziy bank axborotida.