Italiyaning markaziy qismida sodir bo‘lgan zilzila qurbonlari soni 63 kishiga yetdi. Bu haqda, ANSA agentligiga asoslanib, “TASS” xabar bermoqda.
Agentlik o‘z manbalariga tayangan holda ushbu sonni keltirmoqda — bu borada hali rasmiy bayonot berilgan emas.
Ilgari qurbonlar soni 38 kishini tashkil etgani xabar qilingan edi.
Zilziladan tog‘li hududda joylashgan aholi punktlari — Amatriche va Akkumuli jabr ko‘rgani aytilmoqda. Yer osti silkinishlari poytaxt Rimda ham sezilgan.
Eslatib o‘tamiz, zilzila Italiya markazida mahalliy vaqt bilan 03:36 da (Toshkent vaqti bilan 06:36 da) sodir bo‘ldi. 6,0 magnitudali yer silkinishi epitsentri Riyeti provinsiyasida 4 km chuqurlikda joylashgan edi.
