Qozog‘istonda yoqilg‘i quyish shoxobchasining portlashi oqibatida ikki kishi kuchli kuyish jarohatini oldi

Qozog‘istonning Oqsoy shahrida avtomobillarga yoqilg‘i quyish shoxobchasi portladi. Natijada ikki kishi jabrlandi, deb xabar bermoqda “Nur.kz”.

“4-avgust kuni mahalliy vaqt bilan 15:45 da G‘arbiy Qozog‘iston viloyati Oqsoy shahridagi ‘Alau gaz’ gaz quyish shoxobchasida 10 kubometrlik ikkita gaz aralashmasi (propan) zaxira idishi portladi va 25 kvadrat metr maydondagi operator xonasi yondi.

Yong‘inni o‘chirish 16:20 da boshlandi va 16:34 da bartaraf etildi. Voqea joyidan kuyish jarohatlari bilan Burlinskiy tumani Markaziy shifoxonasiga operator va haydovchi yotqizildi. Yong‘inni o‘chirish uchun 14 kishi va 4 ta texnika jalb etildi”, – deb ma’lum qildi mamlakat IIVning favqulodda vaziyatlar qo‘mitasi rasmiy vakili Ruslan Imankulov.

Jarohat olganlardan birining tanasi 55 foiz, ikkinchisiniki 95 foiz kuygan.