Toshkentning Samarqand darvoza ko‘chasidagi tramvay yo‘lida Chevrolet Cobalt avtomobilining qoldirib ketilishi natijasida 8-yo‘nalish bo‘ylab harakatlanuvchi tramvaylar harakati to‘xtab qoldi. Bu haqda Facebook’dagi “Voditeli Tashkenta” guruhida xabar qoldirilgan.
Hodisa aynan qachon sodir bo‘lganiga aniqlik kiritilmagan. Fotoxabar muallifining qayd etishicha, u tramvay haydovchisi bo‘lib ishlagan, suratdagi Cobalt sabab hodisa ro‘y bergan kuni kunlik rejani bajara olmagan va shu kuniyoq ishdan haydalgan.
Muallifining yozishicha, u darhol Yo‘l harakati xavfsizligi xizmati xodimlarini chaqirgan, ular 20 daqiqada yetib kelgan (fotosuratda militsiya mashinasini ko‘rish mumkin), biroq “bundan foyda chiqmagan”. Cobalt egasi esa (muallifning qayd etishicha, haydovchi ayol kishi bo‘lgan) mashinasi tramvay yo‘lini to‘sib qo‘yganidan afsusda ekanini bildirgan.
Eslatib o‘tamiz, avvalroq Toshkent shahar hokimi 2016-yilda tramvaylar faoliyati tugatilishi, tramvay relslari demontaj qilinishi yoki ko‘mib tashlanishini ma’lum qilgan edi.
Yo‘l harakati qoidalarining 91-bandiga ko‘ra, tramvay yo‘llarida, shuningdek, bevosita ularga yaqinroqda tramvaylarga harakatlanishiga xalaqit beradigan bo‘lsa, shuningdek, 3.27 (“To‘xtash taqiqlangan”) yo‘l belgisi doirasida to‘xtash taqiqlangan. Ma’muriy javobgarlik to‘g‘risidagi kodeksning 128-6-moddasiga muvofiq, haydovchilarning to‘xtash yoki to‘xtab turish qoidalarini buzish eng kam ish haqining uch baravari miqdorida (18-aprel holatiga ko‘ra — 390 720 so‘m) jarima solinishiga sabab bo‘ladi.
Izoh (0)