So‘nggi bir-ikki kundan beri kechasi havo sezilarli soviganini hisobga olmasa, 2016-yilda quyosh charaqlamagan biror kun bo‘lmadi hisob. Qishning ikkinchi oyidagi bu qadar noodatiy iliqlik, bahoriy havo tabiatni muddatidan avval uyg‘onishga majbur qilmoqda.
12-yanvar kuni taniqli xonanda Lola Instagram’dagi sahifasida fotoxabar qoldirdi — uning yozishicha, derazasi oldida boychechak ochilgan.
16-yanvar kuni Facebook foydalanuvchilaridan biri Chirchiq shahrida boychechaklar gullagani haqida xabar qoldirdi.
17-yanvar kuni “Daryo” mobil muxbiri Gulnora Yusupova Toshkent shahrining Mirzo Ulug‘bek tumanida binafsha va boshqa gullarning ochilganini, 18-yanvar kuni esa bodom gullaganini ma’lum qildi.
Chirchiqdagi boychechaklar, Toshkentdagi binafshalar haqidagi xabar chop etilganidan so‘ng, Facebook foydalanuvchilaridan biri “besh kun avval Surxondaryoda bodom gullagani” haqida yozdi.
Surxondaryoda yanvar oyida bodom gullashi — ro‘y berib turadigan hodisa. Masalan, 2015-yilning 15-yanvarida O‘zbekistonning eng janubiy viloyatida bodom gullab ketgani, bunga “havo haroratining mutassil +10 daraja iliq kelishi” sabab bo‘lgani aytilgandi.
Sinoptiklarning so‘zlariga ko‘ra, yanvardagi bunday iliq havoning sababi — atmosferada janubiy-g‘arbiy oqimning ustunlik qilayotgani va u bilan chet janub hududlaridan O‘zbekiston hududiga iliq va nam havoning kirib kelayotganidir. Bu tushunishga biroz qiyinroq gap, shuning uchun e’tiboringizni 2015-yilgi mana shunday bahoriy yanvardan so‘ng mart oyida qanday qahraton qish bo‘lgani haqidagi “O‘zgidromet” axborotiga qaratamiz:
“2015-yilning ahamiyatli tomoni, to‘rt faslda ham iqlim me’yoridan iliqroq bo‘ldi, eng sezilarli farq (+2,7 daraja) qish mavsumiga to‘g‘ri keldi. 2015-yilning ahamiyatli havo anomaliyasi mart oyi oxiridagi sovuqlar bo‘ldi — hamma joyda daraxtlar gullagan bir vaqtda Ural hududlaridan keskin sovuq havo kirib keldi. 29—31-mart kunlari O‘zbekistonning barcha hududlarida qor yog‘di. Harorat kechasi -7...-2 daraja sovuq bo‘ldi. Bu so‘nggi 50 yildagi eng sovuq mart bo‘ldi. 30—31-mart kunlari O‘zbekistonning aksariyat hududlarida meteokuzatuvlar tarixidagi eng past harorat qayd etildi”.
