Moskvada muxolifatchi va publitsist Vladimir Pribilovskiy o‘lik holda topildi

Muxolifatchi va “Korporatsiya: Putin davrida Rossiya va Davlat xavfsizlik qo‘mitasi” kitobining hammuallifi Vladimir Pribilovskiy Moskvadagi kvartirasidan o‘lik holda topildi. Bu haqda ijtimoiy tarmoqlarda uning hamkasblari Yuriy Felshtinskiy va Aleksandr Verxovskiy ma’lum qildi.

“Hozirgi paytda hech qanday qo‘shimcha ma’lumotga ega emasman”, — deb ta’kidladi Felshtinskiy.

Verxovskiy Facebook’dagi sahifasida Pribilovskiyning o‘limi haqida kechasi ma’lum bo‘lganligini qayd etdi.

Ushbu ma’lumot huquqni muhofaza qiluvchi organlar tomonidan hozircha rasman tasdiqlanmadi.

Pribilovskiy 59 yoshda edi. U “Panorama” axborot-tadqiqot markazi, “Antikompromat” internet nashri va “Subtropik Rossiya” harakatining rahbari sifatida tanilgan edi.