16—17-may kunlari Jahon iqtisodiyoti va diplomatiya universitetida BMT Axborot ofisi tomonidan tashkil qilingan BMT Modeli konferensiyasi bo‘lib o‘tdi, deb xabar qiladi UzDaily.
BMT Modeli universitetda 10-marta o‘tkazildi. BMT Modelining bu yilgi konferensiyasida JIDUdan tashqari O‘zbekiston davlat jahon tillari universiteti, Toshkent davlat sharqshunoslik instituti, Toshkent xalqaro Vestminster universiteti, Toshkentdagi Singapur menejmentni rivojlantirish instituti, Toshkent moliya instituti, Toshkentdagi Turin politexnika universiteti, Toshkentdagi Inha universiteti, Toshkent temir yo‘l muhandislari instituti, Navoiy davlat pedagogika instituti hamda Andijon, Guliston va Urganch davlat universitetlarining 132 nafar talabasi ishtirok etdi.
Qatnashchilar konferensiyada 3 qo‘mita – BMT Xavfsizlik Kengashi, Jahon sog‘liqni saqlash tashkiloti hamda BMT Bosh Assambleyasining 5-qo‘mitasining ayni damda dolzarb bo‘lgan mavzulari bo‘yicha majlis o‘tkazdi.
Konferensiyaning birinchi kunida bosh va norasmiy debatlardan keyin har bir qo‘mitada qarorlar qabul qilindi. Ertasi kuni tadbirning yopilish marosimida BMT Axborot ofisi tomonidan faol qatnashchilar uchun sertifikat va esdalik sovg‘alari topshirildi.
Izoh (0)