Qozog‘iston poytaxti Ostona shahridagi “Ostona Arena” sport majmuasi oldida yo‘lovchi avtobusi yonib ketdi, deb xabar bermoqda “Interfaks”.

Guvohlarning so‘zlariga ko‘ra, ushbu avtobus prezident Nursulton Nazarboyev ishtirokida “Sariariq” velotrekida o‘tkaziladigan tadbirga bolalarni olib ketayotgan bo‘lgan. Mahalliy vaqt bilan soat 12:00 da boshlanadigan “Yagona Vatan! Yagona taqdir! Yagona yetakchi!” tadbiri Birinchi prezident kuni munosabati bilan tashkillashtirilgan.

Yong‘in qisqa tutashuv oqibatida chiqqani taxmin qilinmoqda. Guvohlarning so‘zlariga ko‘ra, jabrlanganlar yo‘q, yo‘lovchilar yong‘in boshlanmasidan avtobusni tark etishga ulgurgan. Sport majmuasi oldidagi turargohdan barcha avtobuslar boshqa joyga ko‘chirilgan.