2014-yilning 26—30-oktabr kunlari Toshkent shahrida Xalqaro gimnastika federatsiyasining 80-Kongressi o‘tkaziladi, deb xabar bermoqda O‘zbekiston Milliy Olimpiya qo‘mitasi.

Mazkur Kongressda Xalqaro gimnastika federatsiyasi prezidenti Bruno Grandi, Osiyo gimnastika ittifoqi rahbari Rahmon al-Shatri boshchiligida dunyoning 80 davlatidan kelgan 240 nafardan ortiq mehmon ishtirok etadi.

Poytaxtdagi International Hotel Tashkent mehmonxonasida o‘tkaziladigan Xalqaro gimnastika federatsiyasining Bosh Assambleyasi 29—30-oktabr kunlari o‘tkaziladi. Unga qadar esa 26—28-oktabr kunlari tashkiliy qo‘mita a’zolarining yig‘ilishi bo‘lib o‘tadi.

Assambleya yig‘ilishi kun tartibidan jahonda gimnastika sportini yanada rivojlantirish, Xalqaro gimnastika federatsiyasining yangi tahrirdagi Nizomini tasdiqlash, tashkilotning 2014-yil bo‘yicha moliyaviy hisoboti hamda 2015—2016-yillar uchun smetasi tasdiqlanadi. Bundan tashqari, yig‘ilishda Xalqaro gimnastika federatsiyasi va texnik qo‘mita a’zolarining saylovi o‘tkaziladi hamda navbatdagi Kongressni qayerda o‘tkazilishi aniqlanadi.

Ma’lumot uchun, Xalqaro gimnastika federatsiyasining Kongressi har ikki yilda bir marotaba o‘tkaziladi. Xalqaro gimnastika federatsiyasining 80-Kongressini Toshkent shahrida o‘tkazilishi 2012-yil Meksikaning Kankun shahrida bo‘lib o‘tgan Kongressda e’lon qilingan.