Xitoy OAVlari: AQSh maxsus xizmatlari Gonkongda “rangli inqiloblar” texnologiyasidan foydalanishga urinmoqda

Amerika maxsus xizmatlari Sharqiy Yevropadagi “Rangli inqiloblar”ning muvaffaqiyatli tajribasini Gonkongga ko‘chirmoqchi. Bu haqda Xitoyning “Xuantsyu shibao” gazetasida chop etilgan maqolada aytiladi, deya xabar bermoqda “ITAR-TASS”.

Unda qayd etilishicha, shu yilning iyun oyidan buyon Gonkong boshqaruv tizimini demokratlashtirish talablari bilan ommaviy aksiyalar uyushtirayotgan “Sentralni egalla” norozilik harakati yetakchilari Gonkong-Amerika markazida o‘quv seminarlarini o‘tgan.

Ushbu notijorat tashkilotning rasmiy maqsadi “xitoylik va amerikaliklar o‘rtasidagi hamfikrlikni oshirishga ko‘maklashish”dan iboratdir.

Nashrning ta’kidlashicha, o‘quv seminarlarida AQSh bosh konsulligi xodimlari faol talabalardan “demokratik o‘zgarishlarni olg‘a surish”ni talab qilgan, bunga javoban Vashington ularni qo‘llab-quvvatlashini, ularning Amerikada o‘qishlarini ta’minlashini va’da qilgan. Seminarlarda xalqaro ekspertlar talabalarni norozilik harakatlarini uyushtirish sir-sinoatlari bilan tanishtirgan.

Shuningdek, gazeta Gonkong-Amerika markazi rahbari Morton Xolbrukni josus deb atagan.

“Shunday taassurot yuzaga keladiki, ushbu markaz Sharqiy Yevropa “rangli inqiloblari” tajribasini Gonkongda ichki vaziyatga ta’sir o‘tkazish maqsadida qo‘llashga urinmoqda”, — deya ta’kidlanadi maqolada.