Ukrainaning qochib ketgan prezidenti partiyasi hamkori, Forbes ro‘yxatiga kiruvchi multimilliarder Rinat Axmetov o‘zining metallurgiya va ko‘mir korxonalaridagi ishchilarini rossiyaparast ayirmachilarga qarshi norozilik aksiyalariga qo‘shilishga chaqirdi. Bu haqda Reuters xabar berdi.
Avvalroq eng badavlat ukrainalik asosan Donetsk viloyatida joylashgan korxonalari ishchilaridan xususiy militsiya tuzish haqida e’lon qilgan edi. Axmetovning ishchilari ko‘chalarda militsiya bilan birga qurolsiz patrullik qila boshlagan.
Chaqiriqdan so‘ng, ishchilar o‘z korxonalari hududlarida qurollangan ayirmachilar barrikadalari yonidan mashinada klaksonlarni chalib o‘tgan. Ayirmachilar esa ularga javoban Axmetovdan zavodlarni tortib olishga va’da bergan.
Ushbu magnatning boyligini Forbes 12,2 milliard dollarga baholagan. Uning qo‘l ostida 300 mingdan ortiq kishi ishlaydi.
Axmetov qurollangan jangarilarning ommaviy harakatlari boshlanganidan buyon birinchi marta ayirmachilar harakatini keskin qoraladi va ularning faoliyatini “Donbassga qarshi genotsid” deb atadi.
Izoh (0)