Kanadaning Blekfalds shaharchasida sodir bo‘lgan jinoyat antiqaligi bilan ajralib turadi. 25 yashar, uy-joysiz Jessi Seska zargarlik do‘konini talagach, qochish uchun turli transport vositalarini ham olib qochgan, ammo baribir qo‘lga tushgan. Bu haqda mamlakatning markaziy ommaviy axborot vositalariga tayanib “ITAR-TASS” xabar bermoqda.
Zargarlik do‘konidagi buyumlar bilan birga u yerdan o‘qotar qurolni ham olib chiqqan talonchi voqea joyidan yashirinish uchun qorda yuradigan mashinasini olib qochgan. Uni haydab ketayotib, yo‘lda botib qolgan va mashinani tashlab, qalinligi bir metr keladigan qorda piyoda yurib, yaqin atrofdagi fermagacha yetib olgan. Jessi u yerdan avtomobil minib qochgan, lekin u ham botib qolgan!
Seska yana qorda yurib navbatdagi fermagacha piyoda yetib olgach, fermerning yuk ortuvchi traktorini minib qochgan. Keyinchalik uni qo‘lga olgan politsiyachi Edrian Din shunday deydi: “Fermerlar bizga xabar qilishlaricha, kimdir ularning omborxonasiga kirib, u yerdagi traktorni haydab qochgan. Bungacha biz bir necha soatdan buyon Seskani izlayotgan edik. Darhol o‘sha yerga yetib bordim va fermerning xotini bilan birga qorda yuruvchi mashina yordamida dalalar va qiyaliklar bo‘ylab jinoyatchining iziga tushdik”.
Ular 45 daqiqa davomida sakkiz kilometr yo‘l bosib, Jessini quvib yetishgan. Jinoyatchining dala texnikasidan foydalanishdagi tajribasizligi ularga qo‘l kelgan. Gap shundaki, Seska olib qochgan payti traktorning yuk ortuvchi mexanizmi ko‘tarilib turgan bo‘lgan, uni qanday tushirishni esa jinoyatchi bilmagan. Natijada yo‘lidagi o‘nqir-cho‘nqirlardan birida traktor muvozanatni yo‘qotib, ag‘darilib qolgan.
Omadsiz talonchi shu tariqa qo‘lga tushgan. Do‘konni o‘margani, uchta transport vositasini olib qochgani – hammasi inobatga olinib, unga tegishli ayblovlar e’lon qilingan.
Izoh (0)