Crittercism tahlil kompaniyasi mobil dasturlarning turi va qo‘llanadigan operatsion tizimi bilan bog‘liq holda ishlash barqarorligi bo‘yicha tadqiqot olib bordi. Tahlil uchun bir oy muddat mobaynida bir milliard nafar foydalanuvchi ma’lumotlaridan foydalanildi. Bu to‘g‘rida kompaniya e’lon qilgan natijalarga asoslanib “Sukerberg pozvonit” sayti xabar bergan.
E’lon qilingan reytingga ko‘ra, iOS uchun yaratilgan dasturlar Android’ga o‘rnatiluvchi dasturlarga nisbatan ko‘proq ishlamay qolar ekan.
Android tizimining turli versiyalari ichida eng barqarori 4.4 KitKat bo‘lsa, dasturlarning ishlashi bo‘yicha eng “chidamli”si Samsung Galaxy S4 bo‘lib chiqdi: unda dasturlar ishlamay qolishi 0,9 foizni tashkil etgan. Yetakchi Android-qurilmalar orasida dasturlar eng ko‘p (1,7 foiz holatda) ishlamay qoladigani esa Nexus 7 plansheti ekan.
iOS-qurilmalarga kelsak, eng barqaror ishlaydigani – hozirda ishlab chiqarilmayotgan iPhone 5; dasturlari eng ko‘p buzilib qoladigani esa iPad 2 bo‘lib chiqqan. Ta’kidlash kerakki, Apple o‘z mobil operatsion tizimining barqarorligini ancha yaxshilagan: iOS 7.0 versiyasida dasturlar ishlamay qolishi 2,1 foiz bo‘lsa, 7.1 versiyasida bu ko‘rsatkich 1,6 foizga tushgan.
Dasturlarning eng ko‘p buzilib qoladiganlari o‘yinlar bo‘lib, ular 4,4 foiz holatda ishlamay qoladi. Eng ishonchlilari esa internet-tijorat dasturlaridir: ularda bu ko‘rsatkich 0,4 foizga teng.
Yuqoridagilardan kelib chiqib, Crittercism mobil dastur ishlab chiqaruvchilar ularning barqarorligiga alohida e’tibor qaratishlari lozimligini ta’kidlaydi. Shu bilan birga, tezlik masalasi ham ahamiyatga ega, deyiladi xabarda.
Izoh (0)