Ўзбекистонда 2026 йил I ярмида озодликдан маҳрум қилинганлар сони 2025 йил мос давридагига нисбатан 2 минг 133 нафарга (22 фоиз) ортди. Бу ҳақда Олий суд маълумот берди.
Таҳлилга кўра, январь-июнь ойларида судлар томонидан республикада 11 минг 703 киши озодликдан маҳрум этилди. Таққослаш учун, 2025 йил мос даврида бу кўрсаткич 9 минг 570 минг нафар эди.
Жорий йилнинг дастлабки олти ойида озодликдан маҳрум қилинганларнинг энг юқори улуши Тошкент шаҳрида қайд этилди — 2030 нафар. Кейинги ўринларни Фарғона (1462) ва Тошкент (1452) вилоятлари банд этган. Энг кам улуш Қорақалпоғистонга тўғри келган — 317 нафар.
Тошкент шаҳридан икки нафар шахсга умрбод озодликдан маҳрум қилиш жазоси тайинланган.
Ҳукм қилинганлардан 179 киши қасддан одам ўлдириш, 1 минг 376 киши қасддан баданга оғир ва ўртача оғирликда тан жароҳати етказиш жиноятларини содир қилган. Яна 1 минг 789 нафар шахс безорилик, 5 минг 788 одам гиёҳвандлик билан боғлиқ жиноятларга қўл урган.
Ярим йил давомида қарийб 3 минг 605 киши коррупцион жиноят содир этгани учун судланган. Шунинг 779 нафари озодликдан маҳрум қилинган. Яна 614 нафари жаримага тортилган бўлса, 1 минг 479 нафари ахлоқ тузатиш ишлари, 711 нафари озодликни чеклаш жазоси тайинланган.
Аввалроқ Ўзбекистон судларида кўрилган жиноят ишлари сони олти ойда 29 фоизга ошгани хабар қилинганди.
