Ўзбекистон президентининг тегишли фармони билан Шерзод Хўжаев энергетика вазири этиб тайинланди. Унинг номзоди Олий Мажлис Қонунчилик палатаси депутатлари томонидан маъқулланди.
Шерзод Хўжаев фаолиятини 1998—2001 йилларда Энергетика ва электрлаштириш вазирлигида дастурчи-муҳандис сифатида бошлаган. 2004 йилдан 2010 йилгача “Ўзбекэнерго” давлат акциядорлик компаниясида турли лавозимларда ишлаган, 2017-йилгача компания директори ўринбосари, 2018 йилгача компания директори бўлган.
Тайинловга қадар Шерзод Хўжаев Энергетика бозорини ривожлантириш ва тартибга солиш агентлиги директори лавозимида ишлаб келаётганди. Энергетика вазирлиги Хўжаев учун бегона эмас, 2019 йилдан 2023 йил январга қадар у энергетика вазири ўринбосари лавозимида фаолият юритган. Шерзод Хўжаев 16 январь куни, энергетика инқирози фонида Тошкент шаҳри ҳокими Жаҳонгир Ортиқхўжаев ва “Иссиқлик электр станциялари” раиси Фарҳод Абдураҳмонов билан бир қаторда ишдан олинган эди.
Шерзод Хўжаев Сенат мажлислари ва матбуот анжуманларида қатнашиб, шунингдек, ОАВга интервьюлар бериб келган фаол амалдорлардан бири ҳисобланади. Хусусан, унинг 2019 йилда “Уйида чироғи бор одам қурол кўтариб, урушга чиқмайди”, деган гаплари ижтимоий тармоқларда кенг муҳокамаларга сабаб бўлганди.
“Афғонистонга электр энергия етказиб бериш Ўзбекистонга қандай манфаат беради? Халқимизда ‘Қўшнинг тинч — ўзинг тинч’ деган мақол бор. Бу Афғонистондаги тинчлик ва барқарорликни таъминлашдаги асосий фактор. Уларга электр энергияси етказиб берсак, уйида чироқ бўлади, бирор бир ишлаб чиқаришни йўлга қўяди. Ишлаб чиқариш билан банд бўлган одам, қўпол қилиб айтганда, қурол кўтариб урушга чиқмайди. Бу лойиҳага ‘Ўзбекистон электр энергиясини сотиб фойда олиши керак’ деган фикр билан қарамаслик керак. Бунинг маъноси анча чуқурроқ…”, деган эди ўшанда Шерзод Хўжаев.
2020 йилда “Kun.uz”га берган интервьюсида энергетика вазири ўринбосари Шерзод Хўжаев электр энергияси ва газ етишмовчилиги борасида эътирозлар кўпайгани “муаммонинг кескин кўпайганини англатмаслигини” айтганди. Ўшанда у олдинлари вазият бундан ҳам оғир бўлгани, лекин одамларда ҳозиргидек мурожаат қилишнинг кенг имкониятлари бўлмаганини таъкидлаган.
Шерзод Хўжаев 2022 йил 24–26 март кунлари ўтказилган Тошкент халқаро инвестиция форуми доирасида “Дарё” нашрига интервью берган. Суҳбатда вазирлик расмийси энергетика соҳасидаги муаммолар, январда рўй берган блекаут ва электр энергияси билан боғлиқ саволларга жавоб қайтарган эди. Энергетика вазири ўринбосари суҳбат давомида электр энергиясини ишлаб чиқариш ҳажмини оширишдан кўра, таъминотнинг ишончлилиги ва барқарорлигини кучайтириш муҳимлигини таъкидлаганди. У электр тармоқларини янгилаш, истеъмол маданиятини ошириш, давлат корхоналарида бизнес тамойилларини жорий этиш, энергетикадаги табиий монополияларни самарали бошқариш ва ёш кадрларни тайёрлаш зарурлигини қайд этган.
“Тарифлар эркинлашиши самарасини икки тоифага ажратиш мумкин. Биринчиси, нарх-наво ошганидан кейин одамлар энергияни тежаб ишлатишга ҳаракат қилади. Бугунги кунда электр етишмаслигидан қийналаётган одамлар эмас, керагидан ортиқча ишлатаётган одамлар тежашни бошлайди. Улар иқтисод қилишни бошлаганидан кейин, кимгадир етмаётган жойга энергия етиб боради. Бунинг самараси икки ойда сезилади. Лекин бу миқдор унақа катта бўлмайди. Бир йилда энергиянинг иқтисод қилиниши кейинги йилдаги ўсиш билан ёпилиб кетади. Ишлаб чиқариш кўпайиши 2-2,5 йилда сезилади. Тариф эркинлашгандан кейин инвесторлар ҳам келиб, иш бошлайди. Улар электростансия қуриб, энергия ишлаб чиқариб, сотиб, ундан фойда олишга кўзи етса, 2-2,5 йилда биринчи станцияни ишга туширади”.
Шунингдек, Шерзод Хўжаев бундан тўрт йил олдин энерго ресурслари тақчиллиги бўйича энг кўп муҳокама қилинаётган саволларга жавоб қайтарганди. “Агарда етарли миқдордаги табиий газ импорти йўлга қўйилса, иссиқлик электр станциялари белгиланган режа асосида етарли миқдорда электр энергиясини ишлаб чиқариб, истеъмолчилар тўлиқ таъминланади. Аҳоли хонадонларидаги газ босими билан боғлиқ муаммолар ҳам ечилади”, деганди у.
Жўрабек Мирзамаҳмудов
2022 йил сентябридан бери Энергетика вазирлигига раҳбарлик қилиб келган Жўрабек Мирзамаҳмудов президент фармони билан лавозимидан озод этилди. Бунгача Мирзамаҳмудов “Ўзатом” агентлиги ва “Ўзкимёсаноат” компаниясини бошқарган. 2019−2020 йилларда Жўрабек Мирзамаҳмудов, шунингдек, энергетика вазирининг биринчи ўринбосари — “Ўзатом” агентлиги бош директори лавозимида ҳам фаолият юритган.
“Gazeta.uz” сўнгги ойларда Мирзамаҳмудовнинг оммавий тадбирларда кўриниши сезиларли даражада камайганига эътибор қаратди. У президент иштирокидаги энергетика масалаларига бағишланган йиғилишлардан олинган суратларда тобора камроқ кўринган. Хусусан, 6 ва 17 июль кунлари нефть-газ соҳасини куз-қиш мавсумига тайёрлашга бағишлаб ўтказилган йиғилишларнинг эълон қилинган суратларида вазир кўринмаган.
Унинг фаолияти даврида электр энергияси ишлаб чиқариш ҳажми ошди, Россиядан газ импорти бошланди, электр энергияси ва газ тарифлари сезиларли даражада кўтарилди, шунингдек, қуёш ва шамол энергетикаси соҳасида йирик лойиҳалар ишга туширилди.
