Наманган вилоятида фуқарони Бирлашган Араб Амирликларига фоҳишалик қилиш учун жўнатмоқчи бўлган аёл қўлга олинди. Бу ҳақда Ички ишлар вазирлиги ахборот хизмати хабар қилди.
Қайд этилишича, Давлатобод туманида яшовчи, 1970 йилда туғилган (муқаддам судланган) аёл Андижон вилоятида яшовчи таниши билан ўзаро тил бириктирган. Улар Учқўрғон туманида истиқомат қилувчи фуқарони Дубай шаҳридаги тунги клубларда ишлаш ва фоҳишаликка жалб қилиш мақсадида хорижга юборишга уринган вақтида ИИБ ходимлари томонидан ушланган.
Аниқланишича, ҳуқуқбузар хорижга жўнатиладиган ҳар бир қиз эвазига 200 доллар миқдорида пул олишга келишган бўлиб, жабрланувчини Тошкент орқали жўнатишни ташкил этган.
Мазкур ҳолат юзасидан Учқўрғон тумани ИИБ ҳузуридаги тергов бўлинмаси томонидан Жиноят кодексининг 135-моддаси (одам савдоси) 2-қисми билан жиноят иши қўзғатилган. Ҳозирда дастлабки тергов ҳаракатлари олиб борилмоқда.
Аввалроқ Тошкент аэропортида тўрт нафар аёлни Туркияга фоҳишаликка жўнатмоқчи бўлган шахслар ушланганди. Яна бир ҳолатда 20 ёшли аёлни фоҳишалик учун Дубайга юбормоқчи бўлган шахс қўлга тушган.
