АҚШ ва Эрон ўртасидаги навбатдаги музокаралар Покистон пойтахти Исломобод ёки Швейцариянинг Бюргеншток шаҳрида ўтказилиши мумкин. Бу ҳақда Покистоннинг Dawn нашри дипломатик манбаларга таяниб хабар берди.
“Музокараларни қабул қилиш учун икки вариант кўриб чиқилмоқда, аммо Исломобод энг эҳтимолий манзил ҳисобланади”, дейди манбалардан бири.
Нашрнинг маълум қилишича, музокараларда Эроннинг ядровий дастури, Теҳронга нисбатан жорий этилган санкцияларни юмшатиш, хорижда музлатиб қўйилган Эрон активларини озод қилиш масалалари муҳокама қилинади. Шунингдек, томонлар Ҳурмуз бўғозида хавфсизликни таъминлаш ҳамда Исроил ва “Ҳизбуллоҳ” ўртасида Ливанда амал қилаётган ўт очишни тўхтатиш келишувига риоя этилишини ҳам кўриб чиқиши кутилмоқда.
Al Hadath телеканали манбаларига кўра, АҚШ ва Эрон вакилларининг навбатдаги учрашув 11 июль куни Покистонда бўлиб ўтади.
Телеканал манбалари музокаралар кун тартибидан Эронга қарши санкциялар, мамлакатнинг хориждаги музлатилган активларини қайтариш ва ядровий дастур масалалари ўрин олган.
Аввалроқ АҚШ президенти Дональд Трамп Эрон олий раҳнамоси Али Хоманаийнинг дафн маросими муносабати билан Теҳронга музокараларда бир ҳафталик танаффус берилганини маълум қилган эди.
18 июнь куни АҚШ ва Эрон ўртасида ҳарбий ҳаракатларни тўхтатишни мустаҳкамлаш ҳамда музокараларнинг янги босқичини бошлашга қаратилган 60 кунлик вақтинчалик ўзаро англашув меморандуми имзоланган эди. Бироқ орадан бир неча кун ўтиб, Трамп Эронни Ҳормуз бўғозида ўт очишни тўхтатиш режимини бузганликда айблади.
